Wirkung ohne Substanz

[Fallen Angel]

ich weiss das ghört sich seeehr seltsam aa, und wer mir das nöd will glaube dem mach i kän vorwurf, aber ich wür eifach mal gern wüsse, ob ihr schomal sowas erläbt händ.

ich bin sitt sehr langer ziit nüm a partys und das weekend ändlich wieder emal us minere hüte usecho.

ich ha nöd vill gschlafe vom friitig uf de samschtig und so bini dänn relativ müed det acho.

de sound isch vom fiinschte gsi und d'stimmig hät mi au sehr guet dünkt und da ich am tag vorher vill zvill alk gha han, isch mini lust uf getränk nöd vorhande gsi. und suschtigi droge lang ich nüme aa, will ich eifach nöd cha demit umgah, insbesondere nacher, ich vermiss das absolut nöd.

und so hani also chai und wasser trunke und de sound glost und gfrore und gshaked und gmerkt, dassi nur so nöd früere idem ich shake und de sound isch durchwegs genial gsi, psychodelisch und... hey moment psychoaktiv...?

ich ha zwüschedure au mal versuecht z'penne aber es isch eifach z'chalt gsi zum chöne schlafe und so bini wiiterhin wach und immer müeder worde und uf eimal gseh ich wie's füür sone art hüpfer macht und ich denk nur "oh oh"...

und spöteschtens vo det eweg bis ..naja hüt abig.. han ich mich ächt druff gfühlt und zwar effektiv so wie wie NACH neme lsd-flash. während de party hani so zwüsche 3 und 5 versuecht usezfinde ob ich eifach liecht dehydriert gsi bin, ob's dra gläge hät dasi zwenig gässe han.. alles durchus möglich, aber wo dänn am morge de wunderschöni *tshaktshaktshak* *zerzwirbel* sound ufgleit wore isch, und jede schluck wasser sich so agfühlt hät wie früehner wo ich lsd konsumiert gha han (so chli wie es getränk vo götter), da hani ächt chli panik becho.

die einzig erchlärig wo mir neb müedigkeit no in sinn cho isch, wäri passiv-kiffe (ich ha au nöd kifft) aber irgedwie dünkt mich das alles so hmm, unwahrschiinlich. verstönder es isch würkli wie en trip gsi, nur ebe ohni de trip und vor allem ohni dass ich eine gha het.

Isches villicht eifach die langi abstinenz vo dem sound i dere qualität zäme mit de stimmig vo de anderne wo det gsi sind? sone art kollektivs druff sii, usglöst dur musik und müedigkeit (m&m die neui art vo trips ) und d'freud vo allne wo det gsi sind?

ich verstahs eifach nöd - da isch mer brav, trinkt nöd, raucht nöd, schmeisst nöd - und s'resultat: druff vo nüt - das isch irgedwie nöd ganz logisch...

D'frag isch, isch das überhaupt möglich? e kombination vo suufe am tag vorher, wenig schlaf, chälti, gueti stimmig, geniale psy-sound, wenig bis nüt ässe, villicht zwenig trinke und shake bis mer nüme chan = equivalent voneme lsd trip?

oder han ich ohni dasis gmerkt han e anderi bewusstsiinsebeni erreicht? so imne esoterische sinn e art bewusstsiinsverschmelzig mit de party gha? das wär natürlich geil, aber äh.. wie wahrschinlich isch das?

Mer muss villicht no dezue säge, dass es det e frau gha hät wo am morge mega gueti stimmig mit lächle und shake bi de meiste lüüt usglöst hätt, so villicht au eifach bi mir, villicht isch sie das gsi, wo das usglöst hät, wer weiss scho wie das biologisch gseh alles zämehängt.. *smile*

oder isch es villicht sogar möglich, dass mer no jahre spöter es ächts backflash cha ha?

also vermuetlich glaubt mir das eh niemert aber so isches gsi und hät sich's agfühlt und es wär no interessant z'erfahre ob ihr so öppis au schomal gha händ?

Oder villicht sogar jedesmal? villicht au en ufruef a nöd-konsumente, ob sie sich au scho so gfühlt händ, dass de sound wie ne warmi decki isch wo eim iihüllt, und ein sozsäge bewegt, und wo ein sache gspüre laht gseh wo ein erstuunt und au dass mensche uf eimal andersch usgsehnd

das isch au so öppis, es hätt mindestens 4 lüüt gha det, wo ich nöd gwüsst han, ob das lüüt gsi sind woni mal persönlich kännt han. ich ha die lüüt regelrecht agstarrt, und has eifach nöd usegfunde.

ich ha mich au nöd getraut z'frage, wills irgedwie zwar ähnlich usgseh händ aber irgedwie au wieder nöd und da ich nöd gwüsst han was mit mir los isch, hanich's eifach nöd gschafft uf die zuezgah. Will anderi woni vom gseh her kännt han, die hani durchus er-kännt, also ja...

also sehr en seltsame morge isch das gsi - aber schön, de sound hät amel gflasht und d'lüüt au.

[Asrael]

hey fallen angel

es chann durchus möglich sie, über e bestimmti erinnerig / situation es backflash überzcho . mini meinig.

andersiits

vilicht hätdir öpper öppis is wasser tah ,oder du bisch susch evtl. in kontakt cho ???

grüessli

[frä irz]

ciao Fallen Angel
ja ich kenn so sache au, chas aber superschlächt erchläre... (wänn's wiefest oder warum ufträtted, öppis woni voll nöd durblick!)
mini erchlärig dezue: flashige sound (isch ja die einzig WÜRKLICH droge), persönlichi erwartige (wo in e ganz anderi richtig erfüllt wärdet als wie ichs grächnet het, motivations und freudekick zB), "öppis ide luft a de party" (villich die guete vibes?), erinnrige, villich spezielle stoffwächsel im körper, villich es reaktiviere vo de zentre wo mit droge stimuliert werdet (gaht ganz sicher..), ich han au kä erchlärig.. villich 100 chlini sächeli wo zämespiled und denn irgend en chemiecocktail i mir ine mixed.
s üsseret sich au au immer chli anderst. mängisch ischs en "gedankliche" flash, wie e traumwält, es grosses UNREAL. mängisch ischs en optische flash woni mi nöd speziell anderst fühl aber cheibekomischi sache gseh woni nöd so ganz trau und mängisch, aber ganz sältenscht, ischs es richtigs dureschuube es isch aber immer sehr agnehm xi und nie "z vill"

[Zauberhäxli]

Ich glaub dir ganz sicher Fallen Angel, ha nämli ähnlichs au scho erlebt

Was so en Zuestand uslöst, weiss i nöd genau. Aber han mir au scho überleit, was so en Zuestand uslösä cha und bin uf verschideni Überlegigä cho. Also erschtens hät Goa en Rhytmus wo dich cha in Trance versetzä, wells en glichmässig Bass zäme mit psychedelische Töndli hät. Scho vor Jahrtausenden händ sich d`Mensche zum nä Trommelrhythmus in Trance tanzt. Meischtens zum bestimmti Ritual z`fire wie Jahreszitewechsel, Vollmond u.s.w. Mängisch aber eifach nur us fröid am fäschte. Die Mänsche damals händ mängisch so lang tanzt, bis sie am Bode gheit sind und nachher igschlafe sind. S`kollektive spielt däbi sicher ä grossi Rolle. Villicht liegt öis Mänsche s`tanze in Trance im Bluet, nur ischs chli in Vergesseheit grate.

Dänn häsch sicher au scho ghört, dass du körpereigni Droge häsch wo bestimmti Zueständ chönd uslöse, da chömed mir spontan s`Adrenalin und s`Seretonin in Sinn. Dur dis lange tanze i dä Chälti, zu so Musig und mit wenig Ässe chas ebä villicht scho zum nä Trancezuestand cho.

Mir chunnts mängisch au so vor, alls würd ich gspüre, wenn vil Lüt Droge konsumiert händ, bin dänn mängisch sälber chli druf. Wänn anere Party tendenziell eher meh psychedelische Droge konsumiert worde sind, dänn fühl ich mich au chli wie uf Psychedelika.

Villicht bisch zudem au no en finfühlige Mensch, wo d`Energie vu dä Party und vu dä Lüt wahrnimmt. So dass dich all Faktore zäme i dä Zuestand bracht händ. Äs git so vilz`gspüre, wo mä meischtens mit dä Auge gar nöd chan wahrnäh.

Han no äs paar Frage a dich Fallen Angel: häsch Angscht gha vor däm Zuestand oder hasch ihn gnosse? Häsch di chöne vollständig falle lah?

[Silversurfer604]

Hallo

Ich glaub dir das gern, je nach vorgschicht bisch eifach tuned, oder au konditioniert, dä spilts nüme so e rolle ob was gha häsch oder nöd

Grüessli

[wallaby]

Gratuliere !
Bisch en fienfühlige Mensch und gsund. Alles ok.
(zum zviel alk suffe gratulieri natürli nöd!).

Faste und wenig schlaf und tanze sind en vortreffliche Nährbode zum i de speziell Zuestand cho, und natürli isch de gueti Sound und e gueti Stimmig genau das wos no brucht dezue.
Dänn isch alles so schön und es wie do, wome uf acid gsie ish.

Ich dänke es sich weniger en spontane Bäckflash.
Du häsch eifach öpis erläbt wo ähnlich schön gsie isch und dis Ghirn hät ähnlich druf reagiert und dich mit ähnlicher häppyness belohnt.

Es git Lüüt die chömed elei dur tanze i die Trance, und werdet überfluetet vo krasse extatische Freudeschüb, bis nuno schreied und lached...
Me seit au tanze isch e art vo Meditation oder Gebet.
Acid isch e guets Hilfsmittel für geüebti, aber es isch nöd notwendig.

Han au scho parmal sowas erläbt. Isch voll geil findi.
Vilich sind mir scho biz Konsumidiote.
Chum hämer mal e ahständigi Freud und es Riesegaudi, dänkemer öper heg eus es bizli acid is trinke tue...
Nu wil mir eifach nie vorher uf natürlichem weg so en Spass erläbt händ.
Isch nöd traditionell bi eus, soviel Freud und extatischi wöhli z'erläbe.

Ich wür säge, es Acid bringt di einte uf en guete Wäg...

cheers

[Anahata]

Liebi alli,

nime jetzt au sit guet 2 Jahr kei Droge me und hans au ändli mit em Rauche chöne lah und ja, Sound und Tanz flashed gwalltig!

Klar, es brucht sicher e gwüssi Finfühligkeit und au Offeheit, das mer sich uf e anderi Sphere ilaht...aber es lohnt sich.

Ich find jedäm sölls sälber überlah sie, ob er konsumiert oder nöd. Für mich isches nüt me, ich krieg min Flash au ganz ohni fremdi Substanze.
Usserdem fühli mi körperlich vill besser...

So long....

Greez

[Waldgnurpf]

Ha das ou scho es par mau erläbt, nid ganz so stark wie du aber es chunnt noch häre. Nime es ungrads mau mdma, aber meischtens nüt usser öppe eis kiffe. Doch luschtigerwis chani (dür das dasi s'flash kenne) das flash vode angere chönne übernäh, wie xseit es isch sicher nid eso starch.
Weni aber lang shake und denn a bar öppis z'trinke gange go hole, isch mir scho es paar mau ufgfalle das i sone schwärelose zustand ha
I gloube dases irgendwelchi schwingige git wome cha ufnäh wemese kennt.

[Fallen Angel]

Hey also erschtemal es ganz es grosses DANKESCHÖN für eui Kommentär ihr sind würklich eifach mega lieb, das hät mich sehr ufgstellt, dass so villi ihri Erfahrige beschribe händ und uf de Thread gantwortet händ!

hier möchti eifach mal uf eui Biiträg iigah:

vilicht hätdir öpper öppis is wasser tah ,oder du bisch susch evtl. in kontakt cho ???

das hani mir natürli au mal no überleit, aber irgedwie isches ehner unwahrschinlich us zwei Gründ: einersiits glaubi irgedwie nöd, dass öpper wo selber konsumiert das würd mache - d'Lüüt wo sich demit uskänned wüssid ja wie's isch und sind vo dem her sicher nöd bereit sone Verantwortig müsse z'träge. Anderersiits hanich keis "Druff sii"-Flash gha, sondern ehner so das NACH em eigetliche Flash, also wämmer scho wieder obe abe cho isch, aber s'immer no nawürkt, was ich am ganze Konsum an und für sich immer am Schönschte gfunde han. (okey au das mag chli speziell sii, isch aber au mit en Grund wieso s'mich nüm reizt, es isch eifach to much für mich, während de "Haupt"-Phase)

flashige sound (isch ja die einzig WÜRKLICH droge) (...) "öppis ide luft a de party" (villich die guete vibes?) (...) es isch aber immer sehr agnehm xi und nie "z vill"

Ja das stimmt scho, ich ha vergesse, dass de Sound eigetlich das isch wo für die Art vo Flash verantwortlich isch, wie ich's früehner gha han, und au früehner scho so erlebt (villicht nie so intensiv, aber durchus au scho) und wie d'Vibes vo de Party sind natürlich ganz en bsundrige faktor – devo list mer ja au scho ide reports vo 1995er partys – öppis wo mir villicht durch min Konsum früehner au nie so bewusst worde isch... und es isch au agnehm gsi, nöd z'vill, höchschtens sehr intensiv. Es isch uf all Fäll schön gsi, das stimmt scho – leider han ich mir (wie immer) chli z'vill Gedanke gmacht *smile* aber das isch meh öppis vo mir wo halt chli seltsam isch und hät mitem Thema nüt z'tue..

Also erschtens hät Goa en Rhytmus wo dich cha in Trance versetzä, wells en glichmässig Bass zäme mit psychedelische Töndli hät. Scho vor Jahrtausenden händ sich d`Mensche zum nä Trommelrhythmus in Trance tanzt.

Dänn häsch sicher au scho ghört, dass du körpereigni Droge häsch wo bestimmti Zueständ chönd uslöse, da chömed mir spontan s`Adrenalin und s`Seretonin in Sinn.

Wänn anere Party tendenziell eher meh psychedelische Droge konsumiert worde sind, dänn fühl ich mich au chli wie uf Psychedelika.
Villicht bisch zudem au no en finfühlige Mensch, wo d`Energie vu dä Party und vu dä Lüt wahrnimmt.

häsch Angscht gha vor däm Zuestand oder hasch ihn gnosse? Häsch di chöne vollständig falle lah?

hey wow, also da mussi wohl doch no tüfer grabe, also das mitem Sound isch mir au schomal in Sinn cho anere Tranceparty, det hanich mir genau die Gedanke au scho gmacht, und es isch natürlich au öppis wo d'Menschheit sitt jahrtuusige begleitet, villicht scho, sitt mir Mänsche sind - das laht sich dur Zivilisation etc. nöd eifach wegdiskutiere und isch villicht sone art kulturells Erbe wo ide Gen gspeichert isch.

Au die körpereigene Substanze sind en punkt: Droge mached ja *eigetlich* nöd vill meh, als dass sie gwüssi Körperfunktione verstärched, also mdma lahts Seratonin-Lager uf ein tätsch is Hirn ine, etc. - wieso söll das nur mit droge gah, und es gitt ja au bricht vo Meditiatione wo das uslösed. naja ich weiss nöd ob chalt ha und hungrig sii als Meditation zählt aber offesichtlich häts en ifluss gha.

Ich vermuete mal ich bin scho en einigermasse fiinfühlige Mänsch und ha au a vor de Party öppis erlebt wo mich in sone art grund-Melancholie inerutsche lah hät. Die Gfühl (Melancholie und Freud zäme) sind natürlich au sehr intensiv - und lönd ein sich sälber besser gspüre - und so zumindest gfühlsmässig au für d'Stimig vo andere öffne. Ob anderi druff gsi sind, weisi nöd - villicht händ die ja au alli genau s'gliche empfunde..?

Zu dine Frage: also gnosse han ich de zuestand scho, allerdings gheye lah hani mi nöd ganz chöne. ich ha ständig wieder überleit obi jetzt druff bin oder nöd oder was eigetlich... Aber mängmal hani au nöd überleit und eifach tanzt und freud gha und gsmilet. Und uu vill lüüt händ ide Nacht und am Morge so vill Energie überegeh und da hani nöd drüber nadenkt sondern es eifach mit allne andere zäme gnosse. Und bsunders au die Frau wo am Morge, woni ächt müed und kaputt gsi bin, mit ihrem Satz und ihrem Lächle eifach bi so villne, und au bi mir, all die Energie wieder zum Flüsse bracht hätt. (merci )
Und ich han spöter sogar die Melancholie no chli chöne usloote und villicht sogar es stuck wiit abschlüsse. Und ich ha chöne tanze und tanze - dänn hani mir mal de Fuess verknakst, aber dänn eifach doch wieder, chli sanfter, tanzt und so isches dänn uf eimal wieder guet gsi mit dem Fuess (au nacher nöd weh ta) also würklich uu schön das Ganze.
Nur so ganz gheye lah hani mi nöd chöne (zumindest nöd die ganz ziit), willi eifach de muet nöd ufbracht han. Au uf anderi zuegah, das hani nöd chöne, villicht hätt mir ja det scho öpper chli klarheit chöne geh... Es isch wie e Glasschibe vor de andere gsi, e undurdringlichi Barriere - nur im mim Chopf verstaht sich - und die hani nöd überwinde chöne. Hät aber eigetlich au nüt mit dem Thema z'tue - isch ehner e persönlichi sach, wo ni no chli muss dra schaffe. Ich cha mich scho rächt guet uf d'stimmig vo anderi ilah, uf die art villicht chli öffne und "eis werde" mit andere - aber nöd uf "kommunikativi" art und wiis. Villicht isches ja au die Sehnsucht nach de andere gsi, woni nöd ha chöne umsetze, wo sich dänn uf die art g'üsseret hät... hmm ja das chönt echt no sii...

Es git Lüüt die chömed elei dur tanze i die Trance, und werdet überfluetet vo krasse extatische Freudeschüb, bis nuno schreied und lached...
Me seit au tanze isch e art vo Meditation oder Gebet.
Acid isch e guets Hilfsmittel für geüebti, aber es isch nöd notwendig.

Chum hämer mal e ahständigi Freud und es Riesegaudi, dänkemer öper heg eus es bizli acid is trinke tue...
Nu wil mir eifach nie vorher uf natürlichem weg so en Spass erläbt händ.
Isch nöd traditionell bi eus, soviel Freud und extatischi wöhli z'erläbe.

Ja da chani eigetlich nüt meh säge - nur zuestimme

Ich find jedäm sölls sälber überlah sie, ob er konsumiert oder nöd. Für mich isches nüt me, ich krieg min Flash au ganz ohni fremdi Substanze.
Usserdem fühli mi körperlich vill besser...

Ja de Weg möchti jetzt au gah - ich finds zwar schön, dass es Lüt gitt wo chönd mit Droge umgah, die sind meistens uu lieb und herzig und ufenart au sehr bewusst - aber ich cha das nöd, wenn ich uf Droge bin, bini ehner eifach nur doof. also so gseh wänn tanze allei langet, um d'Party intensiv z'erlebe, dann langt das ja (schöne satz, hehe...) – und Droge funktioniered für mich halt eifach nöd. Villicht gahts genau drum, das z'erkenne und villicht hanich au drum das Gschenk vo dem Wuchenänd gha, UM das z'erkenne. Wobii ich's nächscht mal es Zelt mitnimm oder zumindest en Schlafsack *smile* – Dasi mi körperlich so vill besser gfühlt hett, chani also nöd so ganz bestätige: muskelkater, müed, und sone art "uff"-gfühl isch scho da gsi. Was allerdings jede kennt, au nid-goaner wo mal e nacht lang duregmacht händ. Zumindest hani ohni Problem chöne penne woni heicho bin, das isch uf all Fäll en körperliche Vorteil gsi

I gloube dases irgendwelchi schwingige git wome cha ufnäh wemese kennt.

Au wahr - ich mein ich ha i mim vorige Biitrig gfragt wie wahrschinlich das seg und das isch doch eigetlich doof, so öppis z'frage! mer list so vill Büecher über theme wie schwingige, energie und gfühl, kosmos und so wiiter - aber wämmer dänn sälber mal so was erlebt, glaubt mer gar nöd das mer das erlebt. Villicht söttich's mir eifach zuegstah, dass es eso gsi isch und das zum Alass neh es paar atrainierti Zwiifel mal chli azzwiifle. Und au wenn das nöd so isch und es "nur" e biologischi Erchlärig für das gitt - au dänn machts doch s'Erlebti nöd weniger schön.



Ich danke eu vo ganzem Herze für eui Gedanke - und wer weiss, villicht erlebi ja wieder mal so öppis.

[Kollegoli]

ich chan dir au nur gratuliere!

imho isch das was da erlebt häsch keinesweg abnormal und au kein backfläsch. bäckflashs sind doch eh nur sone art mythos.

wie du gseit häsch: arschgeili musig, geili lüüt, supper vibes... das flasht eifach. das isch ja au sgeile am goa und dafür binich eigentlich au a dene partys. und da gids ebe die heruusragende partys, wo ebe so was ide luft liit, was eifach oberaller krassstens isch. so das meega tüüfe, das wo zwüsche de lüüt isch und wo macht, dass all es lächle oder no besser sonen verzerrte usdruck ufem gsicht händ. halt eifach die meeeega power, wo da dehinder isch... halt de altbekannti goaspirit!!!

wänn de würklich da isch, dann fläschts eim eifach, dann chamer doch gar nümm andersch. droge sind da nöd nötig, chönd aber das geile gfühl no verstärche. nu han ich irgendwie sgfühl, dass das vieli nöd beherrschet und sich mit vielne droge (inkl. alk) dem (em goaspirit) eher verschlüsset als öffnet. ich glaub, dasses mit droge ade partys uf langi ziit nur funktioniert, wenn mer fähig isch, de zuestand (sozäge de goaspirit-zuestand) nüechtern ufznäh bzw. sogar zverbreite oder zfördere.

was du beschriibsch, würdich als trance beschriibe, i welli du dich mit hilf vom goaspirit unbewusst iebracht häsch. wennd party oberallergeilstens isch, dann passiert das ganze, ohni dassme gross was defür mache muess. jetz de nöchschti schritt: das chamer au bewusst mache. machs!! du schriibsch, i dir hegs no zwiifel gha, weswege du dich nöd ganz häsch chönne gheie lah. vergiss die! ich kenn die zwiifel au und weiss, dass mer die eus eifach glaube gmacht hät (natürlich nöd so extra voll verschwörigs technisch, aber unterbewuust dur die kollektivi angscht vo de mensche, ihri sturheit usw.). mir wachsed imene umfeld uf, wo en flääsch zha als öpis böses gilt. im kollektive bewusstsii vo eus und eusre gsellschaft isch de gedanke nahezu dogmatisch manifestiert: "en fläsch isch bös! nur bösi mensche sind gfläscht!". vo dem gedanke mümer eus löse. das hat au mega viel demit ztue, dass vieli mit droge nöd klar chömmed; well sichs eifach zu unsicher sind und zumindest unterbewusst sgfühl händ, sie mached was falsches.... wennmer droge nimmt, söttme sich siine sach sowieso sicher sii, susch chas schnell mal komisch cho (z.b. dass mer dann sganz lebe raucht).
wahrschiinli isches doch scho chli das gsi, wo de zwiispalt i dir gmacht hät; du häsch ja schliesslich au en fläsch gha.

wenn ich ammel anere party bin und das binich meistens ganz nüechtern (nur wasser und esse und villicht no en chai), dann versuech ich mich bewusst i die trance inezbringe. bem killerfullon wird das schwer, aber sobald dmusig au nur e chliii spirit hät oder immerhin e gwüssi monotonie, chamer sich uf ebe die konzentriere. i mim chopf machts dann immer ... äähhh... bää bä - bä bäää bä- bä bää bä- bä bäää bäbä. me muss sich irgendwie uf degrundrythmus konzentriere und de so wie ääähh... "iiriibe"; wennmers mal schafft und dann plötzlich no e geili melodie chunnt - boah dann böckelts eim dann aber heftigstens und voila, scho ischmer im fläsch. dann mussme sich nur no im klare sii, dass das nüt böses isch und dann isch supper. droge in regelmässigkeit (sägme mal so all 1.5-4 mönet) sind dann, i miinere philosphie, erst die überübernöchscht stufe.... natürli gids lüüt, die chömed mit droge au soo klar... aber naja.. die meiste anschiinend nöd würkli zu 100%.

[Nicolas]

es brucht sicher e gwüssi Finfühligkeit und au Offeheit, das mer sich uf e anderi Sphere ilaht...aber es lohnt sich....ich krieg min Flash au ganz ohni fremdi Substanze. Usserdem fühli mi körperlich vill besser...

Das kann ich so unterschreiben. Meistens helfe ich als mit THC nach. Das ist ein guter starter.

[Fallen Angel]

irgedwie witzig zu was für schlussfolgerige ich da letzt mal cho bin - also uf gfahr hii langwiili z'verbreite - dasmal hani chli meh pennt bevor ich zu de party bin, und det hani denn au bier trunke - nöd umbedingt wenig, aber au nöd übermässig vill (ein vorteil wänn's bier nöd ganz gratis isch ).

s'feeling isch es anders gsi, isch au andere sound gsi, uf all fäll hani freud gha und es isch schön gsi. ich ha debi es paar sache festgstellt:

de sound und d'stimmig vo de lüüt macht's us, punkt. de grund isch de, dass wänn di de sound mitrisst, und wänn d'lüüt am abgah sind, das unweigerlich zur folg hät, dass mer tanzt - und zwar usgibig. Und da de körper ja au nur en körper isch - unabhängig devo ob mer ihn mit hilfsmittel (bier, red bull, meditation *g* oder anders züg) oder nur mit wasser & chai abfüllt, so hätt er irgedwo e gränzi. die gränzi wird dänn mal einisch überschritte, und dänn chunt fast scho automatisch sone art flash-zuestand z'stand. naja zumindest nach 12h tanze - was mir ufgfalle isch, dass ich ständig wieder e pause brucht han - vermuetlich wirdi eifach langsam alt

im verglich zu de konsum-ziite stell ich jetzt fest, dass droge eigetlich "nur" es flash verursached. idem sinn, dass mer e anderi wahrnehmig hätt. ok mit speed mag sich das so uswürke dass mer weniger pause brucht, nur wänni so zruggdänke hani mir das amel dademit "erchauft" dasi die ganz wuche so chli "komisch" gsi bin. und ich sälber ha ja scho festgstellt, dasi das "nach-flash" immer am geilschte gfunde han. allerdings hani jetzt gmerkt, dass das so nöd ganz ufgaht.

es gitt eigetlich keis nach-flash: es gitt nur müedigkeit bzw. obe-abe-cho-sii. Au wenn konsumiersch bisch irgedwänn müed, nur merksch es je nach dem nümme so - und so hani irgedwänn dänkt: hey irgedwie bini jetzt komisch, das isch sicher vo de droge - nur isches das gar nöd gsi - sondern sozsäge im umgekehrte sinn, ich bin nüme druff gsi, und bin müed gsi und han das (beides) nöd gmerkt, sondern dänkt ich seg ineme nach-flasch. tja falsch dänkt, hehe..

mal churz zämegfasst:

nüchtern: mer merkt schneller dass mer müed isch und macht villicht mal e längeri pause oder gaht go penne wämmer d'möglichkeit dezue hät, isch am nächschte tag somit fit, und chan de ganz tag ohni problem shake. Es Flash chunt dadebi jedoch nur z'stand, wämmer ebe nöd go penne gaht, und "trotzdem" wiiter tanzt. Die "Shaolin"-Methode funktioniert guet, wämmer sich klar macht, dass mer gar nöd so wenig energie hät wie mer immer meint... De vorteil isch, dass wämmer würkli müed isch, mer das au merkt, bzw. de körper merkts und schlaft ii..

alkohol: mer holt sich en energieschub mit alk (aber NUR wämmer au tanzt!) und chan so länger shake, verusgabt sich dadurch natürlich au meh, und irgedwänn isch fertig, will de alk d'psyche insofern beiiflusst, dass mer irgedwänn vom chopf her "nümme mag". au nöd go penne und das isch dänn je nachdem chli problematisch, am nächschte tag schleppt mer sich so dur de tag und irgedwänn isch dänn würkli fertig, entweder, will mer nöd ufhört alk z'trinke (will mer villicht hofft so wieder a energie anezcho) oder will de alk womer scho trunke hät sone art gnervtheitsgfühl verursacht und das isch sozsäge tödlich für d'lust zum tanz. und ohni lust zum tanze bringts der au nüt wänn no chöntsch...

speed: de underschiid zum alk und zum nüechtern sii isch glaub de, dass mer sich seit: hey jetzt hani speed gha, jetzt bini fit - was als solches nöd stimmt. au nüechtern oder mit alk isch mer fit, aso gitts eigetlich gar kein grund speed z'konsumiere. usser halt wämmer das psychologisch gseh brucht, will mer sich das suscht irgedwie nöd glaubt... und dänn am nächschte tag isch das flash ja au mal irgedwänn fertig - de körper isch ähnlich wie bim alkkonsum eher überfordert als ge-fordert worde und so "mag mer nümm" - aso mir isches zumindest so gange. das nüme möge hani dänn amel mit alk kompensiert, was zwar funktioniert (zumindest besser als alk uf alk), aber irgedwie frag ich mich ächt wie ich das eigetlich überstande han. irgedeinisch chunt aber dänn doch de punkt, womer psychisch so fertig isch, dass es au nüt bringt, dass de körper eigetlich scho no möcht - ohni freud am tanze bringt das alles nüt. mit speed zwingt mer sich villicht au dänn no dezue, wänns würkli nüme lustig isch.. (für ein selber)

lsd: psychologisch gseh seit mer sich nach em konsum, mer seg jetzt erscht mal die nächschte 30h oder so wach und dänn gaht mer's ruhig aa. ich ha zwar gern uf lsd tanzt, allerdings nöd umbedingt lang, und bin meistens ehner umeglatscht als dassi würkli am shake gsi wär. währenddesse lootet mer das flash chli us, luägt sich bäum und mänsche a und es sind so vill iidrück, dass au wieder de geist irgedwänn müed wird. allerdings isch schlafe würkli chli schwierig wämmer grad druff isch und drum laht mer's dänn au bliibe. und am nächschte tag wänns flash dänn mal chli abklingt, mag mer dänn plötzli shake und wieso? will mer die ganz nacht umeglatscht isch - und nöd wegem lsd an sich.. oder aber ich ha mir dänn mit alk no es paar stunde "erchauft" (s.o.)

somit händ alli vier methode (wo ich jetzt känne) in etwa de glich ablauf - je nachdem wievill dass mer tanzt, irgedwo isch sone art schranke im hirn, und wenn die erreicht isch, chani nüme tanze. i allne vier fäll isch es möglich usgibig und voller energie z'tanze - aber wänn de chopf nüme mitmacht (oder mer eifach kei lust meh hät) isches gloffe. Am schluss fühli mi so oder so relativ kaputt. de underschied bim (ganz oder zumindest anöchernd) nüechtern sii isch eifach: es isch liechter zum chöne go penne - oder sich usruehbe, will der geist nöd durch zuesätzlichi iidrück und haja fremdstoff gforderet wird.

Die "Wirkung" woni im Thread-Titel agsproche han isch jedoch i allne fäll det z'finde, wo de sound mit heftige oder schöne, mit verzwirbelte oder klare (oder au düstere, wämer a dark psy dänkt) kläng de körper und au de geist so sehr aspricht, dass mer eifach nur no tanzt. Dezue chunt s'ambiente - wänn d'lüüt abgönd und smiled und e gueti stimmig da isch, dänn zieht mer chraft us de ganze party - und gitt die energie vermuetlich au zrugg. ich dänke, au en dj bringt höchschtleistige wänn's folk höchschtleistige bringt, mer schauklet sich gegesiitig uf es flashigs gfühl ue. und wämmer dänn so tanzt dänn strömed körpereigeni substanze (adrenalin, seratonin, luft und wämmer öppis gässe hät vermuetlich au das) durs hirn und mer hät die energie - eifach so.

d'frag isch jetzt nur no, was mer macht, wänn s'hirn nüme mag? hei gah? alk suufe? speed rupfe? go spaziere gah? - ich dänke uf die frage muss sich jede sini eigeni meinig bilde. mir händ droge nöd allzu guet tah, drum lahnis bliibe - ganz devo abgseh, dass ich de sinn irgedwie nöd ganz gsehne - statt (no meh) z'konsumiere, isches villicht au mal sinnvoll hei z'gah uszschlafe und a das z'denke womer erlebt hät - klar mer würd no meh erlebe wämmer blibt und sich mit allne mögliche hilfsmittel dureschlaht - nur hät das erlebti dänn au die glich qualität?

aber vermuetlich gitts öppe so vill asichte und meinige zu dem thema wie's lüt git wo a partys gönd. jede macht sini eigene erfahrige und falls de biitrig irgedöpperem debii hilft sini eigeni meinig z'bilde oder z'verfinere oder über de hufe z'gheye - dänn isch das ja scho vill.

[LittleMissGinger]

@ Fallen Angel

3 Komplimente an Dich

- Du konsumierst keine psychoaktiven Substanzen mehr; dies nach
scheinbar längerem Konsum. Alle Achtung. Das schaffen längst
nicht alle.

- Dein Körper ist in einer anderen Dimension "erwacht". Ich kenne das.
Sei glücklich darüber und geniesse es in vollen Zügen. Viele Leute
müssen sich vorher "künstlich" high fliegen, bevor sie sich so fühlen.

- Du bist letztendlich dem Pulsschlag der Erde und des Universums
begegnet. Dieser existiert tatsächlich, verleiht einem eine riesige Kraft
und ist ein schier unbeschreibliches Glücksgefühl.

2 Fragen an Dich:

- Warst Du während Deinen Erlebnissen evt. traurig darüber, nur schwer-
lich den Kontakt zu anderen Menschen zu wagen; u.a. auch zu dieser
von Dir genannten Frau? Wenn ja, versuche das nächste Mal mutig
"über das Trennseil" zu springen ... .

- Vermisst Du, trotz Deiner Abstinenz, in Deinem Unterbewusstsein
Drogen dennoch? D.h.: Wie hartnäckig musstest Du dich selbst in die
Mangel nehmen um damit aufzuhören? War es eher das Herz oder der
Kopf der Dich dazu bewegte? Oder fühlte sich Dein Austritt aus dieser
"Spähre" etwa ähnlich wie wenn Du einen geliebten Menschen auf-
geben musstest, ihn aber innerlich immer noch sehr liebst,vermisst
und ihm nachtrauerst? Das würde mich interessieren.

1 Tipp an Dich

Dies hat zwar nichts mit "Goa Feeling" zu tun, jedoch mit viel Power,
Afrosound, einer geballten Ladung Live-Rhythmus, Trommeln, Farbe und natürlicher "Trance" in einem 'mal anderen Ambiente.

Ein überwältigendes Life-Spektakel in der zürcher Maag MusicHall:

U M O J A - Das Wunder Afrika
täglich vom 23.04. - 29.04.2007 / Infos + Tickets: http://www.eventim.ch

Zitat Zeitungsartikel: " Eine Woge getanzter Farbe und Emotionen schwappt von der Bühne über das Publikum ... . Kaum ein Zuschauer hält es nach zweieinhalb Stunden noch auf seinem Platz".

Muss "nach dem Hörensagen" ein wahres Erlebnis sein; Afrika ist ja eine Kultur für sich und Ursprungsort des Lebens und des Rhythmus. Ich gehe da hin, wenn's noch Plätze hat.

Vielleicht auch etwas für Dich?


Schöner Gruzzzzzz.

[Fallen Angel]

Also Ginger Du stellsch ganz schön vill frage für dass das es nur zwei sind

hm ja, also ufghört hani eigetlich, willi mal so fast zwei jahr party pause gmacht han - hane fründin gha und das isch mir zu dere ziit eifach wichtiger gsi. lustigerwiis hani sii käneglernt woni uf iboga und extrem vill bier gsi bin, aschlüssend hät sie mich kuriert, mit liebi und ziit... nur das mit em bier hani nöd ganz abgleit aber im verglich zu früehner scho au drastisch reduziert. falls sie das jemals list: danke: für alles wo du für mich gmacht häsch.

heja so gsehts us, sie isch nüme da, und jetzt gahni wieder a partys - nur mit dem vorteil, dassi kei lust meh ha, öppis zkonsumiere.

allerdings möchti da schono feststelle, dass ich nüt gäge konsum und konsumente han, das söll würkli kein anti-droge thread werde, ich bin nu chli überrascht gsi, dass es au ohni gaht. wobii ich grundsätzlich doof bin, willi ganz am afang au nüt konsumiert han - schiints hani das im lauf vo de ziit eifach vergässe... aber es isch mir au klar, dass es lüüt gitt wo gueti erfahrige demit mached und anderne hilfts villicht us sich usezcho, oder au zum öppis erläbe. es isch nöd d'schuld vo de droge, wänn die einte (wie ich) nöd chönd demit umgah...

naja jedefalls bini nöd stolz ufs uhöre oder öppis i dere art - es isch eifach a de ziit, ich has interesse am druff sii verlore und eigetlich wämmer ehrlich sind, häts mir gar nie so würkli guet gfalle - nur hani e abstinenz vo allem, inklusive partys brucht zum das z'schnalle.

so gseh vermiss ich au nüt, und ich gseh das au nöd als sphäre woni jetz verlah han - die sphäre isch ja eigetlich wie gseit ehner det zfinde wo sich freud, müedigkeit und körperlichi höchstleistig zunere gueti mischig findet, undermalt vo sound wo das weckt. leg mi da au nöd so fest was für sound (öb jetzt dark/psy, old trance, progi, metal), aber nur a goas fühl ich mich wohl - clubs sind eifach so chli äh ätzend...

ich bin villicht kein typische goaner (was au immer das isch, hehe) aber ich bin ganz bestimmt kein typische clubmänsch. ich bruch die lüüt um mich ume wo - au wenni nid mitne is gspröch chume - eifach da sind und sich sälber sind, oder es zumindest gniessed überhaupt z'sii. ich liebe de sound aber ich liebe au die lüüt wo det sind, und s'ganze feeling a so partys. abgseh vo goas hani so öppis höchschtens bi kollege-partys imene rümli oder a (standard-)open airs chöne erläbe, aber nöd i clubs.

Es isch halt scho speziell wie goas so sind.. und ich dänke au de sound isch jewils so abwächsligsrich, schön und chraftvoll, dass mer eifach nur scho deswäge es höch hät. "äs flääsht" wie d'berner säged...

was droge agaht, so isches relativ eifach ufen nänner bracht: druff bini nid glücklich, betrunke gaht, isch aber irgedwie mit de ziit chli zermürbend und ganz ohni irgedwas häts mir bisher am beschte gfalle.. wännis schaffe de bierkonsum in gränze z'halte chönt das durchus sone art ufputschmittel für mich sii - so wie für anderi s'kiffe. aber bier tuet ganz eidütig das natürlichli flash chli underbinde - je nachdem cha das au guet sii, also vorletzt wuchenänd wärs villicht ufenart gschider gsi ich hätt am morge mal öppis trunke zum das natürlichi flash chli z'underdrücke - aber dänn natürli au nöd übertriibe

Was d'lüüt agaht: wie gseit ich lieb die lüüt, wie sie so sind wie sie läbed - das isch villicht au es hindernis, die agsprocheni barriere wo ich mir sälber ufboue - mer chan nöd easy mit öpperem rede womer ufes podest stellt, und bi fraue isch das halt no schnell de fall, will die sooo herzig und sooo... naja halt so de kram. Mit fraue rede isch no es spüürli schwieriger als mit manne, will mane normalerwiis nöd panik bechömed, dass meh dra sii chönt als nur interesse amene gspröch - und will halt au will würkli nöd meh drane isch! Bide Fraue chas das natürli scho geh, dass mer sich es stuck wiit i eini verguckt.. so gseh chumi lustigerwiis au am liechtischte mit dene fraue is gspröch wonen fründ händ, will dänn vo vornherein klar isch, dass nöd meh wird sii - sowohl bi ihre als au bi mir.

trurig machts mich natürlich scho wänni all die lüüt gsehne wo mitenand reded und lached und flirtet (ok das hani nöd so oft gseh a goas... wieso eigetlich?) und ich bin eifach nöd fähig s'muul ufzmache - aber was will mer mache? erzwinge bringts au nöd, dänn chunt eh nur stuss usse, und dass de sound geil isch, oder s'wätter schön, händ die andere glaub au scho gmerkt.. gspröch ergäbed sich eifach so - oder halt nöd.

es isch halt au willi en einzelgänger bin, und allei a partys gahne, nöd das goaner sunderlich kompliziert wäred was das agaht (nur ich, hihi), und doch isches halt chli merkwürdig wämmer dänn eifach mit irgedwelche fraue afaht labere und au gruppe vo manne findet das villicht mängmal chli strange - drum: päärli sind guet zum räde oder anderi einzelgänger...

aber wie au immer: so tragisch isches au wieder nöd - falls öpper dänkt ich seg chli komisch - haja ich BIN chli komisch, das isch so. Und e frau wo sich i mich verliebt, wird das vermuetlich au uf irgedenart z'schätze wüsse - suscht wäri vermuetlich eifach nöd de richtig für sie.

anderersiits spillt ja au das kei rolle, wills doch eifach nur drum gaht, z'tanze und freud z'ha und öppis z'erlebe - und eis isch scho mal ganz klar: gspröch ergäbed sich villicht nöd jedesmal - aber dihei mit 100%iger sicherheit gar nie..

[Asrael]

hey ich finds eifach meeega kompliment=D>

es git zum glich no lüüt wien ich wos sich sich no gedanke drüber machet und nöd nume ume drüffnet und blind herumirret und sich oberflächlich amüsieret.

ich konsumier au ab und zue ca. 1mal monetlich kei alk dezue ,Kei Mischkonsum, und a de eint odr andere gueeeete party pusht mich amigs au unendlich ohni öppis zgha ha. die einte fröget mi den au öbi was gha han .

ebe! wen mer will chan igendwie driicho!! gueti gspröch,stimmig ,geist,chakren,positiv vibrations etc..


Alles Ist In Uns Vorhanden!!! mer mues nur enweg finde um driizcho, ums usezhole, ga lah, alles zu geben !!!

Gruüessli