Naja...wenn eim e Frau nümm usem Chopf goht, eifach gar nümm...und das über Wuche hinwäg. Du chasch gwüssi Musig nümm lose wüud denn huere schwärmüetig wirsch, du hesch ires Gsicht die ganzi Zit vor dim innere Aug, du verbringsch e Grossteil vom Tag drmit, über die einti Person nochezdänke und jedes mou dänksch eifach nume "ach, wenn doch nume und überhaupt und wieso bini so verchlemmt und wieso wirdi bi dr Vorsteuig s ire z säge so huere nervös?" Klar isches schön, aber au extrem müehsam. Dr Tag wird beherrscht vo däm einte Gedanke. Und me fühlt es innerlichs Riisse wo immer stärcher wird.Goa Häxli hat geschrieben:Verliebt sie isch die beschti droge.
Und steu dr vor: Du gsehsch die Person zitewiis jede Tag und redisch mit ire und probiersch irgendwelchi unterschwellige Hiiwiis z gä, aber bisch anduurend im Ungwüsse, ob die Hiiwiis das bewürke wo du dir erhoffsch. Me setzt druuf, dass Fraue e gueti Intuition hei und s merke und trotzdäm ischme nach wie vor im Ungwüsse. Und innerlich ringt me jede Tag mit sich. Mängisch würd me das Gfühl am liebste eifach ufd Site schiebe und säge "so, fertig itz, das funktioniert eh nid und i schaffes eh nid und i würd gärn mou wieder a öbbis anders dänke." Aber du bisch dermasse imene Sog inne. Du befindisch di amene Punkt, wod s Gfühl hesch, aus wäre sämtlichi Fasere vo dire Existänz abhängig vo däre einte Person. Süchtig nach däre einte Person. Und wennd se mou es paar Täg oder e Wuche nümm gsehsch, denn merksch, wied uf Entzug bisch. Du hesch innerlich s Gsicht vo däre Person vor Auge und wünschisch dr nüt sehnlicher, aus die wunderschön grazili Gstaut wieder in Realität vor dir z ha, jede Quadratzentimeter vo irere unglaublich faszinierende Erschiinig mit dine Auge abscane und drbii fasch vergo vor Entzückig. Du molsch dr uus wie lang s no chönnt go, bis si wieder zrügg isch und du se wieder gsehsch. Du vergizlisch bi däm Gedanke, du ligsch idr Nacht wach im Bett und hoffsch nume no, dass si am nächste Tag wieder do stoht und rein mit irere Aawäseheit di Tag versüesst. Und wennd denn iigschlofe bisch, verfougt di die Person bis id Träum. Und i dine Träum isch si natürlich do und me het sich scho aues gseit und es het aues klappet und me isch zäme. Und denn lütet dr Wecker und me wacht uuf mitem Gedanke, dass aues nume e Traum gsi isch, usglöst dür das ständige Gedankekarussel, usglöst dür das unerträgliche Gfühl vodr Sehnsucht, usglöst dür das innerliche Füür wo i eim brönnt und eifach nid wott usgo. Im Gägeteil, es wird immer grösser und grösser und frisst eim uuf.
Steu dr vor, du verfluechsch jede Tag d Tatsach, aus introviertierte Mönsch gebore worde zsi. Und jede Tag suecht me nach dr ultimative Möglichkeit, um e Liebeserklärig z mache. Aber die Möglichkeite bietet sich eifach nie, wüu me sich dr Momänt wos söu passiere viu z perfekt vorsteut.
Liebi cha e wundervolli Droge sii...aber solang sich 2 Mönsche nid gfunde hei und d Schranke dürbroche si, isches eher e sehr qualvolli Droge.