8.8.09 - klein aber fein - thalwil

[Goa_Meitli]

ha eigetli nöd als erschti wöle schribe, wil i ersch am morge igendwänn (ufem heiwäg vonre andre party... ) uftaucht bin (wo de sound dä wider gloffe isch... ). aber isch ja eigetli au egal. isch friedlich gmüetlich xi, so, dass mer sis züg igendwo hät chöne liggela unds nacher immerno ume xi isch. wunderbar
festgstellt han i, dass super dj plus super djane nöd super dj-duo git, sondern super hoch mindeschtens zwei dj-duo
lässig, dass mini fee mitgmacht hät mit umestämpfele, obwohl de körper eigelti scho lang nüm het möge (wie würs andersch ga bi dene vibes?)
überraschenderwis isch mer öper über de wäg gloffe, woni scho ewigkeite nüm xe ha und sehr speziell isches xi, uf ihn zuezga und hoi z säge. ha scho gspürt, dass igendwänn de momänt wür cho, aber dases usgrächnet döt wür si, heti niemals für mögli ghalte.
eigetli heti ja geg de mittag wöle hei kläglich fehlgeschlagen...
klein aber fein - das triffts uf de punkt. thx allne, wo debi xi sind, für s organisiere, sounde, hälfe, party mache, chille, debi sii
und glich: ohne dich fehlst du (häsch mi verzauberet). hät dich gern debigha...

[GoaBoa]

Hm naja was söll i do schriebe...
I ha 17 franke i tritt zahlt für genau 1h sound.. danach het's 7h sound vonere autoalag geh..
Irgendwenn hets mer denn glängt und i bi am morge hei gange..
Nid emol dr itritspris hani zrug übercho.. das isch scho es bitzli frech gsi.. . und irgendwie hets nach dem dr generator usgstige isch eifach kei informatione geh was jetzt genau lauft.. au das hani e chli schäbig gfunde, me chönt d lüüt jo wenigschtens informiere wenn ungefähr dr sound wieder chunt, immerhin het me jo geld für das ganze zahlt...

Aber die churz zit wos musig geh hätt , het mer gfalle..

S negscht mol bitte es bitzli besser vorrusplane! au die ganz deko isch in dr nacht völlig untergange, i hoff ihr lerned us eure fehler, i dem sinn

peace me seht sich

[nexus]

für mich hät sich de usflug au glohnt, nur scho dank de eine untrhaltig, mir "sache" (leider) widrmal bewusst worde bin.. MERCI
naja das auto, abr guet isch später widr gange
wägm züg liggelah und widrfinde chunt halt ufd lüüt ah, bin au scho anre zoom xi min rucksack irgendwo und isch na ume xi =)
was ... bewirkt ist eine reduktion der inneren kräfte zugunsten eines emotinalen erfahrens der welt. man vergisst sich selbst und wird erfüllt von anderen dimensionen des seins, den geistigen dimensionen, die nur mit dem herz wahrnehmenden dimensionen...

[caemix]

nach wenig stunde schlaf hanis dänn au no gschafft a klein aber fein party

isch ja anschinänd chli chaos gsi dur nacht dur mit geni und spielzite und so, dadurch händ dä nonius und ich bschlosse dass mär doch eifach äs ping pong zäme machäd..
danke röbi, hät spass gmacht..au mit improvisiertem monitoring.hehe
danke bastel - Dani - Schätzi

danke au a john und manu fürs booking
und au as goa maitli für dis komplimänt
bin zerscht nöd so drus cho, aber nach öpe 5 mal läse hanis dänn au mal checkt
(müdigkeit lässt grüssen!)

danke au an hüttliwart wo eus nochli meh ziit gäh hät.
hoffä händ dä platz dänn au pünktlich chöne abgäh.
greetz
caemix

[essiggurke]

sööödeli.. denn isch ez mal höchsti isebahn für e entschuldigung abracht!!! vorallem a die viele andere gäscht, wo's ähnlich ergange isch wie am GoaBoa..

ja, wie ihr vernoh hend isch de geni usgschtige - gnauer gseit beidi, hend 2 gha- und das het mal zersch mal de sound alle gmacht. die impro-aktion mitem auto isch überbrückig gsi, zum en dritte geni und aschlüssend es zweits mischpult go hole - a dere stell es fetts merci a de herr mitm rote auto mit de GR-nummere, und es risigs an stebo/botales für sis mischpult.. so hemmer "immerhin" am 8, halb 9i chöne wiitermache..
im ganze wirrwarr isch's informiere würkli zchurz cho, öpis zimmli zentrals, da doch schliessli fasch alles um dgäscht und dmusig gaht. schliessli hend die gäscht, wo nöd bis zur reanimierig vom sound blibe sind, würkli 17.- fürd chatz zahlt (oder für e waldparty ohni alag, ganz rüdig gseh.)

@GoaBoa: du kriegsch de itritt wieder. bi denebed gstande wo dr itritt dir isch abgseit worde, und ha viiel zweni schnell gschalte. (meh per pn)

was mi is stuune versetzt het, isch das so viel gäscht i stumpfer (?) hoffig trotz einige soundlose stunde blibe sind- danke dafür!!!
defür isch de hüttliwart würkli oberhammer gsi, das er eus 4h meh geh het zum chli wiitermache (zitat: "euch junge chani doch s'herz nöd breche!!") und so d'nacht es bizli wettmache.

mir hend au na einigi fundsache, drunder:
e fetti cordjagge mit armanibrülle, deo und chaugummi drinn
es paar schwarzi turnschueh
es schwarzes jäggli

leider kein schal wo'd desi glaubs vermisst..

zu gueter letscht muesi sege, das e böseri katastrophe dur mehreri mensche und ihrere guetmüetigkeit verhinderet worde isch, drum merci! @ andi &tano, stebo & fabi, lauscher/päde, röbi/nonius, tom&schneidi (eue liveact wirds na geh!),lolo, cämix, kriiiis, helena, jules, luca, cornelia, dave, carla, raffi&co!, lex fürs helfe genischleppe, michi/wgzo für all blachene, UVflüssigkeit, schnür und de gratisgeni (obwohl mir en gschlisse hend?!) , und finally de herr mitem auto!

[atombrot]

so, schaffis au no mal was z schriibe... has zfescht verchillt nach dere party

mues säge, isch wüki es gedigenigs chlises plätzli gsi. het echt freud gmacht wider mal anere chline party mit herz z sii... leider hends d umständ nöd so wüki guet gmeint, aber da mues mer halt dure. mängisch gat halt teilwis nüt me, aber immerhin sinder doch no wider zu euem sound cho

eigentli wäri wüki gern no länger blibe, aber han paar recht müesami wuche hinder mier und vo afang a scho relativ früe wider hei wöle. so hemmer eus nachere stund uf de strom wartend denn entschiede (vor allem eusere fahrerin zlieb), dass mer gschieder gönd. bin au scho recht im arsch gsi denn

aber immerhin hani dörfe es dj set und min eigene sound bringe, bevor de geni tot gsi isch. s nöxscht mal langeds denn au für de liveact, und denn verschonemer eu nöd

trotz aller umständ, het mi riesig gfreut dete z sii und was biiträge z chöne. hoffe ier lönd eu nöd dur das entmuetige. au no merci a all hallunge, wo die fridlich nacht ermöglicht hend.

[psycoholic]

cha nur sägge, dass all wo am morge gange sind (oder scho i de nacht) öpis verpasst händ.
dän wo dä sound dän äntlich widr gangä isch, isch d'schtimmig würkli dä hammer gsi und sisch no e super party worde...
sind am schluss ä rächt luschtigi truppe gsi
ich glaub all wo blibä sind chönd das nur beschtätigä

...märci ad organisatore für die geil party, au wän ned ganz alles nach plan gloffe isch

[caemix]

sind no äs paar wenigi föteli uf http://www.myspace.com/caemix anguggbar
vill spass bim aaluege

[nexus]

[youtube]*klein aber fein* thalwil 09[/youtube]

verwachigsgux

[psycoholic]

ha nüt uf youtube gfunde

[essiggurke]

http://www.youtube.com/watch?v=_feLuI0Gnm8 würi meine..

[bestia_climae]

he goaboa, denn hesch aber au nöd würkli zueglost - allefalls hetsch di ja chönne informiere, denn hettisch viellicht mitbecho, dass de dritt geni bereits am vieri ume gsi isch und s mischpult bereits ufem weg... und finds e frechheit, zbehaupte, s seg e frechheit, dassd dis geld nüm retour becho hesch. will, wenns danach giengt, müessted all, wo vor de achti hei gange sind, ihres geld retour becho... hetsch nume müesse warte, denn hetsch bis am drü geile sound und superfetzigi stimmig gha . naja, anyway, möcht dich uf kei fall verletze oder beleidige mit dem, woni soebe gschriibe han.

ich finde, s het sich glohnt zwarte. bin öpe am eis oder zwei ide nacht acho, unmittelbar nachdem de zweit geni und somit de sound usgsezt gha het. naja, shit happens - party und friedlichi ziite chamer ja trotzdem ha. oder de wald go erkunde. oder bekanntschafte pflege. oder was au immer =)
jedefalls hanis ganz geil gfunde, wos am morge geg di 8i oder so wieder mitm sound wiitergange isch - en riese dank ade füürpoiherr, wo ide nacht züslet und am vormittag sound vo principles of flight ufgleit het - isch de hammer gsi! danke!

und ganz geil isch au gsi, dass mini danone, desi und 's hübsche toblerone meiteli' mit mir bis am namittag bliibe sind - isch köschtlich gsi, dass d danone zschüch gsi isch, zum d cämix fröge, ob sie denn au na chli wür uflege und stattdesse es chlises meiteli zum fröge gschickt het, hihi - i dem sinne au namal es riesigs danke schön ad cämix; din sound fägt eifach immer wieder vo neuem, geil geil geil!
naja, und suscht, a diejenige, wos feschtle organisiert gha hend, nehmeds mir nöd bös, aber ha mi echt futschgröhle müesse ob dere nachricht, dass ihr sämtlichs material gschlisse hend. au wenns eich nume zum hüüle isch, isch ja schliesslich au nöd für umsuscht, sone elektronischi usstattig. drum mini glückwünsch und kompliment, dass ihr das ganze nöd eifach abblase hend! i hoff, ihr hend de letscht geni na guet abebracht ... danke, käptän görrkle, fürd iiladig und all die fürsorglich verpflegig ala mundschenk und met!

oh, und ich denke, em kofferruumdj gebührt au no einigs a dank, schliesslich ischs au nöd üblich, e autobatterie zum sounde herzgeh!

klein aber fein - super sach - maria magdalena

[GoaBoa]

I ha hallt au nid immer luscht bis am negschte nomidaag z blibe.. i ha 6 wuche ferie gha und am mentig denn wider müesse ind schuel, do hani denkt gha e bitz erholig i form vo schlof wär scho nid schlecht...

Zuedem hani au vo andere ghört dass sie das ganze nid soo super gfunde hend.. aber egal , sisch jo sowieso vergangeheit.

[bestia_climae]

jo easy, chani nur zguet verstah, hend sich ja e paar ob dere sach ufgregt gha und mein gott, sache passiered, da cha niemert defür und degege. ha di au nöd welle afigge, hoff, das hesch gmerkt - schöns tägli no und bis bald im wald oder so.

[psycoholic]

und ganz geil isch au gsi, dass mini danone, desi und 's hübsche toblerone meiteli' mit mir bis am namittag bliibe sind - isch köschtlich gsi, dass d danone zschüch gsi isch, zum d cämix fröge, ob sie denn au na chli wür uflege und stattdesse es chlises meiteli zum fröge gschickt het, hihi

wen meinsch mit toblerone meitli?
ned öpä s'verstrahlte zückerli-chind?