26.04.08 - Annual B Party - B.T.P. & Friends - Seuliamt

[psysfaction]

So i möcht allne viel mal danke wo mer gholffä hend das schöne Fäscht z'verwüklichä.
I dänke das i mis Ziel, ä Party z'mache wo allne freud macht und sich no all äs zietli dra erinnerä werdet, ereicht han.
Da s'wätter so wunderschön gsi isch hemmer d'Party au no chli id längi zoge.
Aso nomal danke a all wo cho sind und Teil vo derä Party gsi isch.

Grüässli Dave

[11]

super Party!

[daniseat]

hehe ja sali zemma, danka vil mal für dia super party isch echt super gsi, userd dasi jezt sehr an rota kopf ha.... danke a ali u bis zum negsta mal....

[Zauberhäxli]

Merci vilmal für Party Dave und ich wünsch dir vu Härze ä gueti Zit in Frankriich!!

Zerscht wo ich cho bin han ich äs Wili brucht bis ich mich a Party gwöhnt han. Isch mer meh wie es Grillfäscht (was au eigentlich au no gsi isch *ggg*) vorcho und weniger wie ä Party, isch halt no niemert richtig am tanze gsi und Tanzflächi isch chli gar dunkel gsi! Zum Glück hät öper später no Fackle ufgstellt, so hät das Ganze viel heimeliger usgseh und isch au vil übersichtlicher worde.

Ich hans aber meeega toll gfunde was dä Gaschtgeber Ässe mässig uftischt hät. Es Buffet mit Brot, Salat, verschidene Grillade und für Vegetarier Gmüesspiessli und das Ganze nur uf Spändebasis da han ich doch gern 20 Franke gspendet!!!

Zum Sound: dä Dr. Magnus gewohnt äs bitzeli düschterer und gheimnisvoller... Aber trotzdem verspielt, hät mir gfallä, nur isch dä Sound fascht ä chli zu schnell zum richtig chöne abshake!! Dä Dj nach ihm hät endlich mal chli meh Lüt uf Tanzflächi bracht und so isch richtig Stimmig ufcho, mit chli älterem Psyprogi (*ggg* immer die Definitionä) bin au ich so richtig in Schwung cho! Nach ihm dä Om Gnom mit Morgäpsy, ä solidi Mischig zwüsched chli älterem Full On und nöiere Stuck, älteri Psystuck wo mich in Erinnerige schwelge lah händ, händ au nöd gfehlt.

Äs Päusli han ich glich mal no brucht und so simer länger am hocke gsi und am Sunne begrüesse.

Nachdem ich die ganz Nacht und au dä Morge total nüchtern (nur Tanzfläsh), hinter mich bracht han, hät mi doch no ä Kollegin zum nä zünftige Drink (Wodka und Red Bull) überredt. Puuuh isch das igfahre, vor allem wo ich dänn no en zweite Drink hinterhergleert han!!! Zäme mit dä Sunne isch das ä gfährlichi Mischig! Möcht mich bi allne entschuldige wo ich bsoffe zueglallt han, isch mer jetzt no chli peinlich i so äme Zuestand wird ich amel richtig überstellig! Uf äm Heiwäg isch es mir dänn sogar chli schlecht worde, was lernt mä drus, besser kei Alkohol oder nur gemässigt!!!

Alles i allem isch äs es total luschtigs Fäschtli gsi!!!!

[Om Gnom]

Halli Hallo

Möcht mich au nomal herzlich bim Dave für das Fäschtli bedanke!!! Es isch ä wahri Freud gsi deht ume z'tigerä
S'esse isch wiä immer unschlagbar lecker gsi und nöd z'knapp bemessä...vorallem diä riisä Steaks...hans nödmal möge fertig ässe so grosszügig sind diä gsi

Diä aschlüssend Party isch nach es paar startschwierigkeite dänn au richtig in schwung cho und d'Soundalag hät endlich so tönt wiä mers händ wellä S'Deko und s'Liecht isch für diä gross Wiese halt eher minimal ghalte gsi. Das liit da drah, dass mer z'erscht Party händ wellä uf em Chiisplatz vor dä Hütte mache...aber wo mer acho sind händ mer das super Plätzli hinter em Hüssli entdeckt und bim ablick vo däm super Plätzli händ mer nöd chönä wiederstah und händ alles deht uf d'Bei gstellt. Und wo dänn Sterne am Himmel erschinä sind, isch sowieso alles Deko überflüssig wordä...
Nachdem bi allne d'Verdauigsmüedigkeit verfloge isch, sind dänn au all diä tanzwilde, wohlgnährte Partyhüpfer a ihres Werk gange und es isch so richtig s'Tanzbei gschwunge worde...
Dä Dr. Magnus hät da super arbät gleischtet und dä Tanzfunke i dä Lüüt fürekützelet! Aschlüssend händ dä Mosaik und dä Psychosomatik d'Stimmig grandios wiiter triebä und dä Lüüt mit fetta Beats und Gitarreriffs igheitzt! So langsam aber sicher bin ich dänn immer chribliger worde uf mis Set und hans chum meh chönä erwarte diä hüpfend und gumpet Masse in Morgä z'begleitä...während diä erste Sunnestrahle fürägügslet händ isch es dänn endlich sowit gsi und es hät mega Spass gmacht allne uf mini Art en guetä Morgä z'wünsche...

Wo dänn d'Sunne so richtig fürä cho isch händ d'Lüt num wellä ufhörä umezgümple...und so hät en vertanzte sunnige Goa Sunntig sin lauf gno...wo dänn sogar dä Hütlimeischter verbi cho isch und mer s'Hüttli suber abghe händ, hät er eus erlaubt uf em Wiisli wiiterzmache so lang mer wänd...juhuu
So isch es immer spöter worde und es hät so usgseh alls wür niemert wellä heigha und so isch immer wiiter tänzlet und glachet worde bis in spöte Namitag...

Das ischwieder eimal meh es super grillier...äss...und Tanzspektakel gsi wo du uf Bei gstellt häsch Dave Merci!!!
Ich wünsch der no en schönä Uslandufenthalt und viel schöni Moment uf dim Reisli!!!

Eu allne sunnigi Grüessli vom Om Gnom...