Traut Ihr euch zu träumen ?

[Kollegoli]

Nach und nach wenni da im Forum ämmel lis, hani sgfühl, dass sich viel lüüt nümm getraued z'träume (nöd im sinn vo schlaf, sondern im sinn vo utopie- oder ebe nöd utopievorstellige). träume wird igendwie scho als extrem uncool agluegt und viel lüüt werded abegmacht, wenns mal lieber träumed. wennmer erwachse sii will, dann dörf mer nüm träume.

ich han sgfühl, zum vo vielne lüüt da als vernünftige, gschiide mensch mit verstand agluegt zwerde, mussme drealität immer möglichscht härt aluege und dörf jah nüt au nur anähernd schönrede - im gegeteil, mer sölls lieber zu härt gseh als mit "enere rosa brülle". lieber zu schlecht als zu guet. hmmm... igendwie au logisch... so chamer natürli verletzige und entüschige vorbüüge. de sicheri weg imho... igendwie für warmduscher, nöd?

was meined ihr dezue? chönnd ihr no träume? traueder eu? oder händer angscht dann als chindisch agluegt zwerde?

[silentsphere]

i bi ä träumer gsi bis immer no u wirdes immer no sii


cha ohni problem im outo, im zug oder so sehr schnell abschweiffe u de no gueti musig de chame vou abtröime

cha doch viel oder???

yeah

[electropunk]

träum söt mä jo eigentlich für sich bhalte, dermit sie in erfüllig gönge oder du findsch glichgsinnti

ansunste werde sie wie ne baum abghacket oder du muesch kämpfe derfür :tfrag:

ich träum immer vom e ne bessere lebe etc. und ha au entsprechendi glücksgfühl wenn si in erfüllig gönge

[Psymäleon]

Das ist ja mal wieder ein richtig "kollegiolis" Thema, wie so oft spannend, interessant und sicherlich jedem von uns bestens bekannt. Ich finde Träume etwas sehr wichtiges, die auch dafür sorgen, dass wir uns weiterbewegen und nicht gefühlslos, uninteressiert und desillusioniert stehenbleiben. Trotzdem holt mich die Realität oft ein, will meine Träume verdrängen und mich zu weniger utopischen Gedanken und Ansichten drängen. Grundsätzlich finde ich es aber auch gut so, denn auch Träumen kann aus meiner Sicht zu viel des Guten sein. Auch wenn man in träumerischen Lüften schwebt, Utopien entwirft, sollte man sich doch regelmässig nach dem Boden unter sich umsehen. Zu viel Rosa in unserem Leben, bringt uns oft dazu zwar zu fliegen, aber dies ständig im Kreis. Ich will aber nicht an der Stelle schweben, ich möchte weiterkommen, mich entwickeln. Dafür sind Träume zwar ein guter Antrieb, um das Ziel (oder zumindest etwas zu erreichen) braucht es aber auch eine gewisse Orientierung an der Realität, damit man nicht übers Ziel hinausschiesst.

Das ist wohl auch der Unterschied zu Oli's Ansicht. Ich bin nicht der Meinung, dass man mit blumigen (realitätsfernen) Einschätzungen des Lebens viel gewinnt. Klar, du kannst alle Realisten und Pessimisten als Warmduscher bezeichnen, es kommt aber immer darauf an, was man daraus macht. Auf der anderen Seite könnte man allen rosa Brillenträger unterstellen, dass sie sich jeder Verantwortung entziehen bis dann alles über ihnen zusammenbricht und sie handlungsunfähig werden. Ich glaube die Mischung machts aus, jedenfalls für mich stimmt's.

[Kollegoli]

Ich glaube die Mischung machts aus, jedenfalls für mich stimmt's.

aso das chani grundsätzlich mal unterschriibe, das isch au mis rezept.

nur hani ebe sgfühl, dass die mischig nöd nur im sinn vo zu viel rosa nöd stimmt (was da ja oft kritisiert wird, im sinn vo "zieh mal dini rosabrülle us"), sondern au uhuerre krass im sinn vo zu viel schwarz.

ich bin nicht der Meinung, dass man mit blumigen (realitätsfernen) Einschätzungen des Lebens viel gewinnt.

dere meinig binich imfall au nöd.
fü mich sind nöd alli bluemige iischätzige realitätsfern. vieli scho, aber vieli au nöd. und das wird da vo vielne (zumindest wo sich zu wort meldet) nöd underschide. optimistisch muss nöd realitätsfremd sii. realitätsfremd isch einzig was absolut nöd realisierbar isch. und vieles vo eusne träum isch gar nöd so unrealistisch, well sichs realisiere laht bzw lah wür, wenns nöd vo einige im vorhinein als rosa und blöd wür agluegt werde und die dann die andere abemached, wells in ihrne auge naiv sind. igendwo e art tüüfelschreis, wo imho ebe vo enere zimli blöde "coolness" gnährt wird.

isch doch egal, wennmer mal zviel träumt hät und deswege entüscht worde isch. kein grund dhoffnig zverlüüre und snöchscht mal scho im vorhinein d'entüschig zaktzeptiere (wo ja dann nümm würkli eini isch, wellmers gar nöd hät drufacho lah). lieber voll dri und luege was passiert, als vornedra in sicherheit zwarte. oder?

ich fröge: was isch sooooo schlimm dra, wenn lüüt naiv sind (natürli; guet isches au nöd unbedingt.). ich han sgfühl, einigi werded scho fascht aggressiv, wenns in ihrne auge naivi lüüt gsehnd (im sinn vo: "lueg mal de blöd glöggligoaner a, de isch ja soo dumm!!!! argghhhh"). ich find en übertriebene realitätsfremde pessimismus schlimmer als en übertriebene realitätsfremde optimismus.

[battlefairy]

Ich finde träume aber extrem cool! ich liebes ds träume, das sind mini Wälte, womer niemer, aber au gar niemer chan nä, woni völlig alles chan ha, mache, gseh, erläbe wienichs möcht, ich glaub, au vill vo minre Läbesfreud chund vom Träume..

Ich träume überall und immerwieder, z.B. im Büro, luegi ufe längere Text wo vor mir ufem Pult liit, gsehne us als obi de agsträngt lise, aber ich bin für paar Minute wiit ewäg z.B. in Korea mit de Haidung Gumdo Lüütlis am Klinge schwinge, oder oh lueg! De Legolas chund grad adsriite und frögt mi, obi mitem ufd Jagd chume, min Boge gschulteret und mir galoppiere quer dur wogends Gras in Mittelerde, um es putzigs Häsi ds schüsse und feins Lembas mit Häsigschmack härstelle. Aber au realistischers, z.B. vo mim Elterehuus, woni in Gedanke am renoviere bin, da en schöni Stäge, döt en Wand useschränze etc.
Usser wenn öpper mit mir redt, denn fangi natürli ned eifach afe träume aa, hihi
Han au ganzi Sequenze woni erläbe(träume), en immerwiiter füehrendi Gschicht, mit Afang, Fortsetzig und kem Änd, z.B: bi per Zuefall ufnes Dimensionstor gstosse und duregloffe, und ide 3.e Dimension glanded (es git 7 Paralelldimensione uf Erde) mir (d“Realität“ uhuhuh, tönt das gross!) sind ide 5.e .. naja, uf jede Fall stossi döt ufne anderi Wält, und stelle fest, dasi ursprüngli vo döt chume, es erklärt sich nach und nach, warum ich ide 5.e läbe, und gfinde zu mir ide 3.e etc. (das isch jez eifach mal es Bispill)
und das cha sich über Monate hizieh.. denn schaffi wieder 3, 4 Stund, denn träumi wieder 5min (ned vo de Sequenz, anderi Sache, dSequenz isch eher, wenni Ziit han, wenni „bewusst“ träume), schaffe na wieder wiiter und träume na bim heifahre im Zug wieder was. Klar, logischerwiis dänki ame au über substanziells nache (sölli zügle? Wie hed jez de Chef das gmeint hütt, woner mir das und dises gseid hed? Was möchti morn Abe mache?), aber träume ghört unbedingt dezue! Zum Läbe!

ABER: das heisst ned, dassi jez en voll verfuslete Drüffnigrind bin und me mich ned ärnscht chan nä! Chame wohl!

Will ich find (ohni wele ibildet ds wirke) dassis scho im Griff han mit de „Erwachsne-Wält“, de „Realität“, ich schaffe, han en Wohnig, ha liebi tolli Lüüt um mich, zahle Stüüre und bin trotzdem noni pleite, cha reise und bilde mich wiiter.

Was isch scho „erwachse sii“? ..oh, glaube off-topic... orry

Träume! Jaa! De Spruch wo öber als Signatur hie hed findi voll cool:
Fantasie ist wichtiger als Wissen, denn Wissen ist begrenzt.
(glaube vom Einstein)

Träume isch es Hobby vo mir. Anderi meditiered, ich träume. Will ich chan ned nüd dänke. Träume isch z.T. au mini Meditation.

Zum Schluss: ich chan mer mini Wält so büschele wies mer gfallt und passt und im Einklang mit de Realität demit läbe. So, und jez musi wieder schaffe, hihi

[Kollegoli]

Han au ganzi Sequenze woni erläbe(träume), en immerwiiter füehrendi Gschicht, mit Afang, Fortsetzig und kem Änd, z.B: bi per Zuefall ufnes Dimensionstor gstosse und duregloffe, und ide 3.e Dimension glanded (es git 7 Paralelldimensione uf Erde) mir (d“Realität“ uhuhuh, tönt das gross!) sind ide 5.e .. naja, uf jede Fall stossi döt ufne anderi Wält, und stelle fest, dasi ursprüngli vo döt chume, es erklärt sich nach und nach, warum ich ide 5.e läbe, und gfinde zu mir ide 3.e

isch ja huerre geil und mega spannend. verzell doch no wiiter, wenn wiiter cho bisch, wennd wilsch.

ABER: das heisst ned, dassi jez en voll verfuslete Drüffnigrind bin und me mich ned ärnscht chan nä! Chame wohl!

Will ich find (ohni wele ibildet ds wirke) dassis scho im Griff han mit de „Erwachsne-Wält“, de „Realität“, ich schaffe, han en Wohnig, ha liebi tolli Lüüt um mich, zahle Stüüre und bin trotzdem noni pleite, cha reise und bilde mich wiiter.

Was isch scho „erwachse sii“? ..oh, glaube off-topic... orry

neinei, isch überhaupt nöd offtopic, das isch sogar schwer ontopic, welli eigentlich ja uf das usewill; träum bzw "abgspacti gedanke" stönd weder em erwachse sii, no suscht irgendöpisem im weg. und die erkenntnis schiint mer da in eusere welt nach und nach under zgah! und das isch tragisch.
was bringt scho das ganze "gsellschaftliche züüg" schlussendlich (alles im griff ha), wennmer sich am schluss nümm erlaubt "in himmel zluege".

[Zauberhäxli]

Ja träume isch wichtig!!! Süscht käm mir ja s`ganze Läbe und mini Zuekunft sinnlos vor. Nöd das i ä schlächts Läbe han (im Gegeteil), aber wenn i alles würd schwarz gseh und nöd optimistisch wär, würd i nöd wellä Läbe. Ich finds absolut nöd verwerflich, wemer vunere bessere Zuekunft für d`Menschheit und au für sich tröimt. Den Tröim chönd au Realität wärde....

Was ich aber nöd so guet find, wemer versuecht us sim Läbe id Tröim flüchte. Das hani früehner würkli zvil gmacht. So bin ich mit dä Zit mit em Schuelalltag, Kollegä finde u.s.w. nüme zrächt cho, ich han eifach kän Bezug zu mim soziale Umfeld gha und mich deshalb au nöd chöne integriere. Ich bin eifach sooo vil i minere Traumwelt umägreist, han gläse und d`Figure us dä Bücher sind vor mim geistige Aug zum Läbe erwacht. So bin ich halt meischtens ä Einzelgängerin gsi (obwohl ich mich nach Kontakt gsehnt han). Au no hüt han ich i däre Beziehig äs Defizit. Ich chan darum mini Fründschafte au nöd so pfläge wie ichs gern wet unds au guet wär. Ich han festgstellt, dass i vil meh Zit bruch für mich als Anderi.

Ich find es isch eifach wichtig, das mer ä Balance find zwüsched em tröime und dä Realität. Dänn nur so chamer minere Meinig nah, au Tröim real wärde lah.

[juerg]

Meine Schwester hatt mir mal ein Tshirt mit der Aufschrift
Reality is for people who lack imagination gemalt.
ich trage es auch immer ganz stolz weil ich der überzeugung bin,
dass wir uns, unsere realität durch unsere gedanken selber erschaffen.
Ich möchte "selber" leben und nicht "gelebt" werden
Dafür müssen-dürfen wir aber bewusst der Denker sein, ohne uns von den in der gesellschaft teils über generationen vererbten gedankenmuster,
beeinflussen zu lassen ( oft leichter gesagt als gemacht, aber mit ein bisschen training, kommts dann schon)
Gedanken sind eine der grössten energien die wir zu verfügung haben
Wenn es dann sogar zu einem kollektiven bewusstem denken kommt, kann mann schon fast "Berge verschieben"

Jetzt gangi wiiter go rasemähe..das gaat noni nur mit de gedanke..
aber ohni aschissgedanke, vill liechter

[Shmahu]

aber ich bin für paar Minute wiit ewäg z.B. in Korea mit de Haidung Gumdo Lüütlis am Klinge schwinge, oder oh lueg! De Legolas chund grad adsriite und frögt mi, obi mitem ufd Jagd chume, min Boge gschulteret und mir galoppiere quer dur wogends Gras in Mittelerde

ich glaubs nöd!!! ich han gmeint, ich seg di einzig, wo so schrägi sache macht!! juhuuuu! battlefairy, du bisch di geilscht!! *tanz*
ich dänk mir amel au so gschichte uus, träume ändlos vor mich hi... es entstönd kunterbunti gschichte debi, ich verchnüpfe bekannte gschichte mit neu erfundene... gstalte us verschidene gschichte und filme sind i minere fantasiewält vereint... so chans durchus sii, das ich mitem legolas und de prinzässin mononoke zäme durd wälder streife... mir träffed uf fee und waldgeister, uf magischi ort und wundersami wese. die gschichte chönd sich au bi mir über tag e oder wuche hiizieh... mängisch grabi sogar nach es paar mönet e alti gschicht i mim chopf wider uus und träume si wiiter. ich bruche die tagträum, sie hälfed mir de alltag z überstaa, während ich mitem bus dur di troschtlose strasse fahre und mir nur schwarzkleideti mänsche entgägelaufed. eusi wält isch vill zwenig bunt, dänn muesi halt i minere fantasie chli naahälfe...

geils thema oli... hoffe, es lerned villi mänsche wider z träume...

[Ogetron]

Hät doch jede sini Träum die einte sind erreichbar die andere halt weniger, jedefalls im Moment!

@Kollegoli, de Satz wo i im andere Thread uselah han isch halt uf was bezoge gsi, wie i det den au no gschriebe han.

Ich find gwüssi Tatsache oder Umständ chan mer halt nöd schön träume, denn hät mer nachher au weniger Müä mit de Folge oder de Umständ. Gwüssi Sache sind halt eifach Realität.
Und wenn mer alles unahgnehme würd wegträume würds irgendwenn au nüm ufgah denki mal.

[frä irz]

d realität ändere fangt demit a das mer si umdänkt&träumt. das hät nix mit rosa brille z tue.

that's the point ogetron. egal öbs um abfall gaht oder um es lebensziel.

träume ruuuuuult schwääääär. chönnt nöd läbe ohni.
your mind creates reality


tnx für das thema, isch glaubs nötig das mer mal wider über realität und so gredet händ

[altered]

hmm träume würdi au widermol gern. leider machi das nümm dank jahrelangem excessivem marihuana konsum .

und die antwortmöglechkhait fehlt obe leider. denke ben nid der einzig do im forum wellem das so goht.

[i.dot]

Träume hmmm......ich liebe träumen.....harte schale weicher kern..träumen tun wir alle gern hehe

[Elias]

...das tönd alles sehr romantisch...
Rückblick 7.12.08