An und für sich isch es doch guet, gits die grosse Partys, demit alli wo grad chli Geld händ oder überhaupt mal luscht händ, hinder de bar z'schaffe die werte gäscht usem usland z'gsicht bechömed. Die Partys sind oft im summer, sind oft e chli länger, und für mich letzt jahr wie ferie und en anderi wält gsi. mir hät de father oblivion am last summers end würkli guet gfalle, und au suscht: vill lüüt, vill gspröch, vill erläbnis, das isch für mich wichtiger wie d'live acts, wo ich sowieso ständig verpenne (grins). bi mir aber au bewusst, dass das nöd für alli so isch, und dass e organisation sicherlich au gnueg bsuecher brucht, um e 50'000er chischte auf d'bei stelle. ich chönt mir vorschtelle dass ich, wenn ich wür uflegge, wänni dänn d'möglichkeit hät am summers end ufzlegge, ohni öppis defür z'becho, ich das durchus no so richtig geil fänd. wür dänn vermuetlich halt das uflegge wo mir gfallt, seg das jetzt in- oder usländisch - es isch eifach goa(musik). aber ich bin au kein ch-dj
und dänn sind da die ville chlinere partys v.a. früehlig und herbscht, aber au im winter, ja sogar im summer, geburtstags- und abschiedspartys, wo d'kollege vom kolleg uflegged, und ein mit anderscht schönem sound ine anderi wält bringed. wo mer ufenart verbunde isch, halt mit weniger lüüt, defür mängmal no intensiver, wo mer meh wäg de natur und de umgebig gflasht wird, wie wägem deko. und ich chönt mir vorstelle, dass wänn ich det uflegge und die party lauft super und ich chume dänn no en hunderter über wo ich in neui vinyls cha inveschtiere, obwohl gar nöd demit grächnet han, dass ich mich wür drüber freue.
also so gseh: ob jetzt vill oder wenig deko, vill oder wenig lüüt, vill oder wenig live acts, ich ha so zimmli a jedere party, sogar de meischte indoor partys erläbnis gha, erinnerige wo immer wieder uechömed.
es hät scho einigi diskussione geh da inne, segs wege psy/progi, darkpsy/psy, wäg iitrittspriise, wäge sound, weg spass oder ernscht, aber was bi all dene sache immer chli vergässe gange isch (au vo mir wie ich mit erschrecke chürzlich feschtgstellt han), mir alli gönd doch eifach GERN a die partys, und mir chönd doch froh sii, gitts so live acts wie gms, wo eus verzaubered, mir chönd doch froh sii, gitts so freaks, wo sich vinyl platte chaufed, und diheime uf nere alte "alag" lerned uflegge und üs verzauberet mit ihrem gschmack, mit ihrem style, mir chönd doch froh sii, sind all die goa-lütlis, so villsiitig, dass sie über monate hinweg dekos baschtlet, dass sie sich mit de behörde umeschlönd für bewilligunge, dass sie s'risiko uf sich nähmed und mal was chliners nöd so ganz bewilligts durezführe, dass sie getränk in höhlene schlepped, und d'boxe nöd z'vergässe, dass sie nöd immer glich sind, sondern immer wieder andersch, dass sie au chömed a die ville ville partys wos da hät, sodass a fascht jedere party gnueg lüüt hätt wo tanzed, erläbed, lached, enand känne lernend und dass es all das gitt.
ich find das eifach geil
was ich absolut ungeil finde sind gagene ab 5000 stei für zwei stund uflegge, oder mängmal au nur eini -> das isch i mine auge nüt anders als abzockerei, name hin oder her. dänn also lieber e cd ietue, oder eine uflegge lah, wo das für 500 macht und dänn aber vollgas gitt. oder eini. ich glaub scho dass die live acts live spilled - ich glaub nur nöd dass es sinn macht es finanziells risiko iizgah wo sich nöd rächnet. und es hinderlaht halt scho chli en komische nachgschmack, wämmer sich überleit, dass schwiizer dj's grundsätzlich leer usgah sölled, während bekannti näme villicht es biz z'vill bechömed. evtl. müsst mer mit dene verhandle, und säge, "hey, wänn du a üsi party willsch zahlemer 2467.50 und kein rappe meh, wotsch, oder wotsch nöd?" - de spiess also eifach mal umdrülle. und wenn er dänn nöd wött - dänn isch er sälber gschuld. dänn häter nämli d'chance verpasst vorneme absolut geile publikum sin sound z'präsentiere. und e geili party verpasst.