TiA hat geschrieben:Ich mag den Geschmack von Fleisch nicht. Ich mag auch keine Fleischersatzprodukte die den Geschmack von Fleisch haben.
genau so geits mir au!! i ha au scho mit knapp 13 ughört fleisch ässe, ha de aber i dr jugendziit schweri problem mit krankheite becho... dr arzt het mir de gseit, dass es besser für mi körper wär, wenn i fleisch würd ässe- wöu dr menschlich körper das eiglech au bruucht.. i ha de agfange poulet z'ässe, wöu das s'einzige fleisch isch, woni gern ha. das bhlat i au hüt bi! sit i 2 - 3 mau im monet e chli poulet isse, geits mer würklech besser, das isch nid nur e ibildig!!! i finges au guet, wenn me weniger fleisch isst. aber mi fründ z.B. liebt fleisch über aues- und selbsverständlech koch ig ihm es kottelet.
leider chan i dir ke tipp gä, wie besser chasch ufhöre!! für mi isches eifach si, wöu i dr gschmack nid gern ha. für di wird das glaub einiges schwieriger!! viu glück!!!
Freunde sind Engel, die uns wieder auf die Beine helfen, wenn unsere Flügel vergessen haben, wie man fliegt.
aso ich bin kein vegi, iss öpe 1 mal in 2 wuche fleisch.
als tip um weniger fleisch zesse, chani höchschtens gäh, dass mal id bioläde und reformhüser go gügsle söllsch (was wahrschiinli scho gmacht häsch). det häts würkli interessants und teils sehr geils züüg. letschtin hani so "soya-klösse" kauft. die sind troche und du chasch si is esse gheie, dann suugeds sich mit flüssigkeit voll. sie händ biss, sind fein und uf de verpackig staht, dass si 6 mal so viel eiwiis händ wie fleisch. naja, au wenns nur scho 2 mal so viel isch, isch das doch scho supper, so rein stoffersatz-technisch.
fü mich macht halt es fleischloses feins esse mittlerwiile viel meh sinn, well ich da viel meh dehinder stah chan und au merke, dasses mir besser tuet. nach fleisch, vor allem nach viel fleisch, hani ämml en rechte chrieg im mage. es fühlt sich halt eifach au geiler a, wenn dur mis grad gessene esse verhältnismässig wenig bis gar kei leid entstande isch. dann chani nachem ässe es voll befriedigends "jaaa!!" vo mir gäh und han en inere, wenn au versteckte und unterbewusste konflikt weniger. so wirdich für mini achtsamkeit sogar belohnt und chum was zrugg über. umgekehrt, wenni mich nöd achte und eifach i mich inestopfe, was ich bis vo öpe 2 jahr gmacht han, dann schlahts mer, nebem schade wos i mim hirn und i minre persönlichekti arichtet, well ich mich vo mir entferne, übel uf de mage, weswege min mage jetz scho recht agfiggt isch und ich oft buchweh han... (isch aber ufem weg zur besserig).
zur restliche disk.:
ich findes voll in ornig, wenn ander lüüt meh fleisch essed als ich. was ich nöd in ornig find, isch, wenn lüüt wo die ganz ziit fleisch essed nöd druf achtet, vo wos ihres fleisch händ und sich nöd mal minimalscht müeh gänd, dass ihres tier nöd so hät müsse liide. das findich dan ehrlich gseit zimlich nazimässig; die eint rasse underdrückt die ander, eifach so, wells es us irgendenere spinnerei grad in ornig findt, oder eifach ignoriert. nöd dass ich deswege en hass uf die lüüt han; ich han mich selber uhuerre lang nazimässig verhalte und wer weiss, villicht mach ich das ja ohnis zwüsse immer no. "vergieb ihnen, denn sie wissen nicht, was sie tun"
was ich kei entschuldig find, isch zsäge: "mir isch egal vo wo ich mis fleisch han, well alles andere esse isch eh au nöd besser", was vieli sich säged. das isch schlicht und eifach e selbtalüügerei.
s historische und evolutionäre argument, findi kein guete grund bzw. usred. dmenscheit hat scho immer fleisch gesse. das stimmt, es hat immer zu eusre natur ghört und sicher au zu de entwicklig vo eusem hirn, wie de psymi immer seit, biitreit. was aber gnau so zu eusre natur ghört, isch, dass mir eusi natur hinderfröged und sie ändered; mir händ dmöglichkeit zentscheide. mir händ dwahl zwüsche fleisch ässe, und kei fleisch ässe. es tier hät das nöd. mir chönnd wähle, ob mir es lebewese für eus wennd liide lah (sehr sehr übel liide lah) oder nöd. es isch doch no recht krass, dass sich so viel vo eus defür entscheided, slebewese liide zlah, währed die ander wahlmöglichkeit bis uf en gwüsse (afängliche) verzicht absolut kei nachteil mit sich bringt. wennmer sogar no wiiter überleit, bringt die 2. wahlmöglichkeit sogar einigi sehr entscheidendi vorteil mit sich.
ich bin halt de meinig, dass mir eus da echt nöd unnötig münd liide lah. es söll friede herrsche uf de welt und niemertem (und so au keine tier) sölls unnötig schlecht gah. das Denke tönt idealistisch und utopisch, würkt sich aber direkt uf eus als person us. wenn ich so handle, dass es kei leid be anderne verursacht, dann chanich eifach viel meh hinder mir selber stah und ich fühl mich eifach besser. das isch e eigeschaft, wo eus allne gmeinsam isch. es gid lüüt, dene schiints egal zsii, wenns anders lebe unterdrücked oder zerstöred. mit em abstelle oder ignoriere vo dene negative gfühl, wo das handle aber eigentlich verursacht, werded automatisch au anderi sache vo eusre persönlichkeit abgstellt und kaputt gmacht. es macht eus kaputt. das merked leider die meiste nöd.
es isch mir momentan wohl nöd möglich, voll und ganz so zhandle, dass dur mis handle kei leid entstaht; aber ich versuechs immerhin bis zume gwüsse grad. ich wird de weltfriede und de zuestand, wo niemert und nüt meh muss unnötig liiide, ganz sicher nümm erlebe. aber de weg dethii und de biitrag dur mis handle dazue würket sich scho jetz uf mich us und fühled sich eifach geil a. unnötig leid zverusache isch nöd notwendig! das händs eus (händ mir eus) nu glaube gmacht.
