Job, Lebensunterhalt

[ChriSmoS]

jo also er isch ned würkli ziel grichted. bi euis ischs mega drufacho wo das gschaffed hesch, de eint uf de staaatskanzlei aargau und de ander inere Webdesign Firma....also gahts da mega wiit usenand und me cha so zimli alles werde was mer will im IT markt...wen programmiere wetsch machsch logischerwies Informatiker. Die gönd eifach no tüfer id Materie...aber als mediamatiker hesch au sKV. Und nachher "muess" mer sich eifach spezialisiere, kürs mache, witerbildige. Ebe sobald weisch was öpe wotsch. da wo du seisch mached z.b. multimedia-künstler, das isch a de fachhochschuel, die sind den au künstler also eigeverdiener, klar wen vedammt guet bisch findsch au en job wennd wetsch, aber es isch usgleid fürs freie schaffe (künstler)...döt schaffsch mit allne mittel wo der dmultimedia welt zur verfüegig stellt. Und en publisher macht au das, er nützt de multimedial bereich für werbige etc. en web-publisher - alles rund ums internet, animatione, filmli, design, underhald vo pages etc.. je professioneller dases mue si, desto me deftig spezialisierti lüt bruchts, aber sgitt au ganz klar de Trend das Büros/Firmene eine wennd wo möglichscht vill chan, und sich überall zhelfe weiss. So dass de chef ned 5 spezialisierti türi lüt brucht sondern nur eine...ja es gitt nur die lehr, wie en Muurer--- und nacher ebe witerbildige, oder machsch hald nur kurse, den hesch eifach kein Fähigkeitsuswies, bzw döfsch eifach ned de name Mediamatiker ha....4 jahr gaht dlehr jetzt....

hehe ja läck jetzt wos seisch samarina, da hani ja alles au mal neumed gseh looool....also euis händs meischtens gseit de Bruef sig usgleit (oder eifach sehr guet) zum projektmanager mache, de mue plane, mit lüt zämeschaffe (programmierer und grafiker etc) und mue überall bizli drus cho (aber doch niene rechtig lol ) daser au chli weiss vo wa de programmierer schnorred ums zkoordiniere, je me desto besser den buechhaltig (KV) megem Budget, Werbig etcetc...lol

[zarina]

... stimmt ...

mir hei vo 18ni bis 25 aus ir klass, vo höbbies über so dolce&cabbana-i-fahre-e-merz-und-ha-es-grössers-schnäbi-as-aui-andere-type bis zu drögeler und sträbis aus ir klass...
die einte bügle bide chraftwärk oberhasli, eini ire buechdruckerei, vili chöme vom bict (dasch e schueu) und när no vo ascom, swisscom ...

ou vom lohn här isch huere mis eilech! die vom bict müesse zale dassi dörfe lehre und hei im 3. lehrjahr 400.- lohn, aso nüt. mir hei im 1. 600 u bis im 4. rächt viu...

[Kollegoli]

hallooo

han denkt, jetzt wo mega viel lüüt meh da im forum sind, chönntme doch de thrad da wieder mal aktualisiere

schriibed doch chli was ihr schaffed und was so die guete und schlechte siite a eurne tschöbbs sind.

[elfchen]

find das thema cool.........han das vorher gar nie entdeckt.....
also i bin chemielaborantin .............

bin aber au abwechsligswis am schaffe und am reisa....
han das johr erscht im septmber wider afo schaffa.........vorher bini am reisa gsi in südamerica und nordamerica.............denn hani im summer no für corris gschafft...........spenda sammla und so.......naja
und serviert hani au scho in dr wintersaison.........

i bliba aifach aswia nit gern für längeri zit am gliche ort..........miar wird immer so schnell langwilig.
i wür gern amol e job mache wo i reisa (muess nit umbeding im usland si) und schaffa verbinde kann..........villicht gitarre spile uf de stross hihihi.........oder en stand ha mit irgenwelche sache wo me verkauft.......
es hängt irgendwia immer am geld!

[meli]

also i bin chemielaborantin

geile job! i bi i mire lehr au ziemli viel im labor- und es macht mega spass!! ha vor, nach dr lehr au d'fachrichtig chemie iz'schloh... spannend, jedä tag was neues und unglaublich viel möglichkeite...

[elfchen]

@meli jo es isch scho en coole job. i kann mr eba nit vorstella da ganz tag ima büro vorem pc zhocke........aber es isch mängisch au müehsam wil halt dia maischta chemikalie giftig sind. immer wenn i as paar mönet nit schaffa und denn wider afon kriagi ussschlag und so ekzem..isch biz müehsam.
du machsch galvanikerin hani glesa......i lesa mängisch git so laborantajobs in dr richtig galvanik...........bisch denn du au en art en laborantin?
was machsch denn so für arbait im labor?

[kaidun]

Aso e ha mol Polymech in fachrichtig konstruktion glehrt.
han vor drü jahr abgschlosse. ez schaffi als 3D konstrukteur. esch eigentlich de absoluti hammer. halt aber med der ziit au immer sgliche..
min traumjob gaht aber ehner richtig musig, grafik und animation.. denn würdimi rechtig wohl füle.. aber be ja na jung und ha no vell ziit

[Silversurfer604]

Na ja wie villi da inne au e versiffti schuelkariere hinder mir, zweimal gfolge in Baden, danach Internat i dä berge, brrrrrr. irgendwenn mal 16 gsi, kei ahnig gha was mache, geils filmli aglueget bim bruefberater, und dänne hani gfunde ich mache mal e bauzeichner lehr, na ja nacheme halbe jahr mal gmerkt das isch was wo mi eigentlich überhaupt nöd intressiert, hans aber na bis zum abschluss durezoge. Danach vieli underschidlichi jöblis, under anderem im promo bereich, orientteppichverchäufer, call center agent, trochesteihmuurbauer, und natürli immer wieder mal chli paar mönet is usland aghaue. Irgendwenn mal mis hobby zum bruef gmach, als informatiker en job gfunde, näbebi na informatik avo studiere, und bald mis diplom i dä täsche. Wobi so langsam hani das au gseh, da ich eher en künschtlerische bezug zum PC gha han, und jetze als profi hani chli d'luscht am verlore a däm ganze digital seich

[Midimal]

Uii Geils Thema...*au grad am id Taschte hau..*

Zerscht mal ganz normali Schuelbildig, 10.Schueljahr, 4 jährigi Elektromonteur Lehr und jetzt bi de Stadt aagstellt als Fehlerortungstechniker/Messtechniker...
fraaged bitte ned was das isch....wär z'kompliziert zum erchläre

Näbedbii machi na s'Elektrotechniker HF Diplom (Fachrichtig Elektronik)...jetzt dä mal s'1.Semi (vo 7) abgschlosse..*brrr*

U natürlich ned z'vergässe s'Musig mache. Bin ja na lang ned ufme Stand vom Simi aber für es Pack Güetzi langets ämal na Freud u Spass und dasis rein Hobbymässig mache staht natürlich im Vordergrund.

Kalte Grüsse

[frä irz]

mercie für thema, spannend! da ich IMMERNO und IMMERWIDER uf de suechi nachm traumjob bin ischs sehr interessant für mich

aso zerscht, sek abgschlosse. denn realbruef glernt: reprografin. hät mi üüüüüüüüberhaupt nöd interessiert aber has durezoge. han dazumal scho überhaupt nöd gwüsst was lerne... zumglück mit gstalterische bms abgschlosse (di geilscht schuel wo gits! )

denn chli jöbblet da und det (segelschuel/reisebüro, callcenter, gastronomie, elektronikbude, ..)

und denn, hirne hirne, was chönnt me no mache? da mich videoanimatione a de partys immer z derb gflasht händ hani welle i de bereich inecho.. also d SAE mulimedia producer denn gmacht und das isch super gsi will i en riese iblick is ganze multimediatatüütata gha han. mit superglück en supercoole job gfunde, das heisst ich baschtle jetzt de tag lang chli websiite, onlineshops, flash und director hauptsächlich....

ich mach das ez 2jahr aber irgendwie.... es isch mer total verleidet (was mal min traum gsi isch )

im moment gibi als nebejob "computerkürs für afänger" für d escom. isch interessant d erwachsenebildig

villich list das ja öppert wo en job z büüte hät ane extrem villsiitig interessierti und flexibli. (botanik, chemie, gsundheit, reise, sozials,.. fast nüt woni mer nöd chönnt vorstelle..) ich glaub ich muess ez denn eifach bald mal was ganz anders mache und vorallem MACHE das ich wiiterchum.. und fliisig das thema im aug bhalte um inspiratione z günne

[meli]

elfchen,

i analysiere im labor vorwiegend die elektrochemische bäder, woni zum galvanisiere bruche. aber nid nume badanalyse, au abwasseranalyse und korrossionsteste ghöre i bereich laborgalvanik. i ha s'glück gha, dass i während mire usbildig 13 mönet is labor ha dörfe und dert alles erlerne ha chönne, was so ines labor ghört- halt vorwiegend anorganischi chemie. ha au glehrt, wie me kristallgitter züchtet, was me so alles us chemie cha mache, was sich loht id luft la sprenge usw. i ha würk glück gha mit mine 2 usbildner- die hei mi jz unter ufsicht jedes experiment la mache.... )

isch ja mega doof, dass du usschläg und so bechunnsch- zum glück hani sowas nid. wär au nid möglich gsi- i ha mit dr bude abgmacht, falls i i de erschte paar mönet en usschlag bechume, dass i muess d'lehr abbräche. verständlech- s'gsundheitsrisiko isch z'hoch. obwohl chemie saugiftig isch und i mit 40 äuä ke naseschliimhüt me wirde ha- i liebe mi job über alles und nimme in kauf, dass das über längeri ziit mini gsundheit gravierend wird schädige...

findes aber au no guet, wie du das machsch- chlei schaffe, chlei reise... das isch die perfekti kombination... hofflech schaffis au mau so, das wär dr hammer

wünsche schöne nami allerseits...

[Psydog]

Also ich schaffe mal da und mal döt! Han dä Summer inere Gärtnerei Zit vertriebe. Sit 2 Wuche bini am Stapler fahre binere Holländisch-Bündnerische Bier-Brauerei. Gfallt mr ganz guat. Und wer weiss, vielicht bini ja eines Tages Brauereichef!

Proscht......

[Rusty]

Na dann will ich mich doch anschliessen:

Lehre als Logistike gemacht, aber nur als mittel zum zweck

Ich habe schon mit 15 jahren als veranstaltungstechniker angefangen, und hatte dazu noch eine eigene disco. Für mich war klar: das ist es!! Nur eben dass man in diesem beruf in der schweiz keine lehre machen kann...

Nach der lehre habe ich als lichttechniker angefangen bei einem kleinen unternehmen. Und danach gings berauf: Rigging ( fliegende oder hängende konstruktionen), Lasertechniker mit TÜV prüfung, und last but not least tontechniker. Durch das arbeiten für verschiedene firmen in der schweiz sowie in deutschland bin ich schon ziemlich weit gereist. Auch international. Nach meiner letzten antellung als projektleiter technik für events habe ich mich dieses jahr selbständig gemacht, und habe nun meine eigene Firma. Ich arbeite nun als freelancer für diverse schweizer technik dienstleister, und bin des öfteren auf grossen und kleineren events anzuterffen, sowie jedes jahr auf der sattelegg. Egal welche farbe sie hat..

Ich habe mir mein hobby zum beruf gemacht, und das ist gut so !!

Ich konzipere, plane und baue anlässe aller art: Partys, Generalversammlungen, Sportanlässe, Corporate events, Galas und natürlich goa partys. Dazu bin ich auch noch fähig ( das sagt man zumindest) den ganzen krempel zu bedienen( operating) und shows zu programmieren.
In letzter zeit habe ich meine tätigkeiten im live mischen verstärkt, und mache auch beratungen für veranstalter.

[Shmahu]

hmm, oli, du weisches vo mir ja scho, aber villicht intressierts ja such no öpper...

bin nach de sek id dms, dänn maturitätsschuel für erwachseni, han dänn zwei jahr orientierigslos umejöbblet und mich schliessli für di pädagogisch hochschuel uufgrafft - und etz bini chindergärtneri und finds en mega geile job. wännd mit chind schaffsch bisch voll im läbe drin, kän tag gliicht sich, es git vill zlache und täglich wirds herz berüehrt - und ich han s gfühl öppis sinnvolls z mache. ok, mängisch giz scheiss-täg wie i jedem andere bruef au, aber meistens freui mi uf d arbet.
ich mach stellverträttige wos gad öpper brucht, das heisst, ich schaff mal für drü mönet neumets, mach dänn viellicht drü wuche ferie, schaff wider für vier mönet und dänn neumets andersch für eine, mach drü mönet ferie usw... wies halt grad chunt. de vorteil isch d freiheit woni chan gnüüsse, de nachteil isch mängisch de gäldstress nachere längere pause. aber eigentli findis cool so.

[tashi]

grabe ich mal denn alten tread wieder aus..

ok also der berufliche Werdegang:

Prim/Realschule -> Velomech. Lehre -> Weiterbildung PC Supporter -> PC Supporter Job gefunden -> Informatik Techniker HF absolviert 3 1/2 Jahre berufsbegleitend.
Und nun möchte ich in einen sozialen Bereich rein. Nur keine Ahnung wie, wann und wo