Sali mitenand
Leider müend mir euch mitteile, das mir Smilinc per sofort us finanzielle Gründ müend uflöse.
Mir händ i dene 3 Jahr wo mir für und mit euch allne Parties gfieret händ, sehr gueti und au sehr negativi Erfahrige gsammlet.
Jetzt simmer amene Punkt acho, wo`s Minus eifach zgross worde isch und eus dra hinderet überhaupt no ruig chönne zschlafe.
Um wiiteri Parties nach eusne Vorstellige chönne zverastalte, müestemer no meh Schulde mache.Das wär allerdings e riise Frächheit gägenüber dene Lüüt, womerscho Gäld schuldet!!
Mir möchtet euch jetzt da gern erchläre wie Smilinc ufbaue gsi isch.
Mir sind zwar e Organisation mit villne Hälfer und Dj`s gsi, aber s finanzielle Risiko und d Verantwortig allgemein händ mir zwei treit.
Mir händ i 3 Jahr knappi 30 Parties gmacht und immer 100% geh.
Mir händ debii diversi positivi Erfolg gha , sind jeni Mal bös bechlaut worde, und Buesse hätts au gnueg geh .( Aber die Zahle wämmer da nöd nänne, da mer nöd wänd gwüsse Lüüt d`Illusion vo de "ach so heile" Partywält neh.)
Guet, das hättemer alles no so halwägs überläbt.
Dänn isch euses supergrosse Wahnsinnsprojekt "A live Smilinc Christmas II " letscht jahr cho.
Es isch vo afang a ä riese Sach gsi, wo aber möglicherwiis klappet hät, wenn mer nöd d`Location 2 Wuche vor dä Party verlore hättet. Mir händ zwar mit vill Hilf, vo dä Mercury Lounge no än Ersatz-Location übercho, aber es isch finanziell würklich total id Hose.
So jetzt gnueg umegschnulzt.
Ihr fröged eu sicher, wieso händ mir dänn unter sönige Umständ nomal ä Party plant und akündigt.
Ganz klar: Will mirs liebet und bruchet!!!
Wobii mir zu eusere Verteidigung müend säge, dass mir ganz fescht grächnet händ. Mir händ es supergeils Lineup zäme ka, für super wenig Gäld.(Vo ganzem Herze danke a alli Künstler wo eus zuegseit händ. Es tuet eus würklich leid, dass mer euch müend absäge.)
Wiäs aber so isch mit guäte Plän und Vorsätz, es chunt meischtens anderscht als mer dänkt.
Und wenn mer so knapp am rächne isch, dänn chan eim so öppis eifach dä Hals bräche.
Dä Grund schlussändlich isch, dass mer Sfr. 1'500.-- zwenig ka händ zum alles usäm eigene Sack zahle und mir wieder hättet müesse Stuz uslehne, was wie scho erwähnt ziemlich denäbet gsi wär.
Au die zuekünftige Plän und Vorstellige wäret eso nöd realisierbar gsi. Euses Herz blüetet und mir weined.
Aber da jedes Ändi au än neue Afang isch, luägemer das doch als Chance für neui interessanti Projekt und Begägnige a.
Ein Teil vo eus gaht zu Fraka Sound, anderi zu Sterneschii und dä gröschti Teil wird aktiv bliibe i dere Szene.
Mir danket allne guäte Geischter und allne böse au. Für all die Erfahrige wo ihr eus gschänk händ.Mir werdet die Ziit nie vergässe.
Natürlich verabschiedet mir eus nöt nur mit dem Abschiedsbriefli, sondern mit "The last smile standing" (wiiteri Infos folget na)
Lineup: Alli Smiler's
Timon, Adastra, Aechi, Altenator, Dussel, Nubis, Nightwalk, Tarabas, Spicky Tricky, CiByrd, Midimal, (Nyando, Psycoduck, ihr zwei damit ihr wenigstens einmal bi eus gspielt händ ( zwei Supertalentierti Nachwuchs Dj's, wo leider erscht es paar Wuche bi eus gsi sind))
Wobii mir natürlich müend säge, dass alli eusi Jungs Hammer Dj's sind, und für jedi Organisation ä Bericherig wäred.
Es riisigs Danke:
David, Denise, David Alephdesign, Sandro, Lea, Mella, Nike und Nina, alli Liechtesteiner, Stationhouse Pipo und Greeni, Rolli, Cäme, Absolut-Family, eusi ewige Gast J., Misch de Tänzer, Chris, Pascal, Teuber, Dani, Dodi el Präsidente, Raffi dä Baumelf, Christoph, Alex, Sascha, Jamaima, Robin und Rob, Rico und Roger, Toni Tonight, Adi, Edi, Migu, Chrüsi, Miguz, Bambi, Stefan und Priska, Päge, Claudio, Wolfgang, Thierry, Athi, Matthias, Marc, Pädy, Thömsi, Dödli, Ines, Leo, Danu, Meilee, Katharina, all eusne Dj's und Liveact's, Atelier Stern, Jugi Zollikä, Candela, Zwerchfell, Züri kifft, Mercury Lounch, Schatt und Schärrer, Triskele Management, Pfadi Zollikä, Crazy Reality, Theater of Goa, Traumtanz, Room 31, Happy People, Höngger-Clan, alli Dj's und Live-Act's wo je bi eus gspielt händ und natürlich alli diä wo mer jetzt nöt böswillig vergässe händ ufzschriebe.
Jetzt möchtet mer na eusi gröschte Dank usspreche und zwar a DICH
.
Will sicher au Du irgendwänn mit eus gfäschtet häsch, und so din Teil dezue biitreit häsch.
Keep smiling
Bis bald Manu & Colin